سابق پاکستانی کرکٹر اور کپتان سرفراز احمد نے انٹرنیشنل کرکٹ سے ریٹائرمنٹ کا اعلان کر دیا ہے، جس کے بعد وہ پاکستان کرکٹ کیلئے ایک یادگار شخصیت کے طور پر یاد کیے جائیں گے ۔
ریٹائرمنٹ کے اعلان کے بعد سرفراز احمد نے پاکستان کرکٹ بورڈ (پی سی بی) کے ہیڈکوارٹر کا دورہ کیا، جہاں انکی ملاقات پی سی بی کے چیئرمین محسن نقوی سے ہوئی ۔
ملاقات کے دوران محسن نقوی نے سرفراز احمد کی خدمات کو سراہا اور انہیں پاکستان کرکٹ کے لیے ان کے بے مثال کردار پر اعزازی شیلڈ پیش کی ۔
چیئرمین نے کہا کہ سرفراز احمد نے پاکستان کی نمائندگی ہمیشہ وقار اور جذبے کے ساتھ کی اور اپنی قیادت میں قومی ٹیم کو متعدد کامیابیاں دلائیں ۔
مزید یہ بھی پڑھیں:فیصلہ کن میچ، بنگلادیش نے پاکستان کو جیت کیلئے 291 رنز کا ہدف دے دیا
انہوں نے کہا کہ پاکستان کرکٹ ہمیشہ سرفراز احمد کے احسانات کی مقروض رہے گی اور ان کے تجربے اور مہارت سے فائدہ اٹھانا جاری رکھے گی ۔
محسن نقوی نے سرفراز احمد کے مستقبل کیلئے نیک خواہشات کا بھی اظہار کیا اور کہا کہ ان کی خدمات صرف کھیل کے میدان تک محدود نہیں رہیں بلکہ نوجوان کھلاڑیوں کیلئے ایک مثالی شخصیت کے طور پر ہمیشہ یاد رکھی جائیں گی ۔
ان کی قیادت میں پاکستان ٹیم نے کئی یادگار مقابلے جیتے اور ان کی شاندار کارکردگی نے ٹیم کے لیے فخر کا باعث بنی ۔
سرفراز احمد نے اپنے کیریئر کے دوران بطور کپتان اور کھلاڑی پاکستان کرکٹ کو نمایاں کامیابیاں دلائیں۔ ان کے شاندار فیلڈنگ، مستقل مزاجی اور قائدانہ صلاحیتوں نے انہیں ٹیم کے لیے ایک لازمی ستون بنایا ۔
مزید یہ بھی پڑھیں:تیسرا ون ڈے: پاکستان کا بنگلادیش کے خلاف ٹاس جیت کر پہلے فیلڈنگ کا فیصلہ
ان کی ریٹائرمنٹ کے بعد کرکٹ شائقین اور سابق کھلاڑی ان کی خدمات کو یاد کرتے رہیں گے اور ان کے تجربے سے نوجوان کھلاڑی فائدہ اٹھاتے رہیں گے ۔
