پاکستان کرکٹ بورڈ کی جانب سے سری لنکا کے خلاف آئندہ ٹی ٹوئنٹی انٹرنیشنل سیریز کے لیے قومی کرکٹ ٹیم کے 15 رکنی اسکواڈ کا اعلان کر دیا گیا ہے۔ یہ سیریز جنوری 2026 میں کھیلی جائے گی اور اس کے تمام میچز سری لنکا کے شہر دمبولا میں ہوں گے۔
اعلان کے مطابق قومی ٹیم کی قیادت سلمان علی آغا کریں گے۔ وکٹ کیپر بلے باز خواجہ محمد نافع کو پہلی بار ٹی ٹوئنٹی اسکواڈ میں شامل کیا گیا ہے، جبکہ شاداب خان نے کندھے کی سرجری کے بعد ٹی ٹوئنٹی فارمیٹ میں واپسی کی ہے۔ اسکواڈ میں شامل اور خارج کیے گئے کھلاڑیوں کے نام بھی باضابطہ طور پر جاری کر دیے گئے ہیں۔
اس سیریز کے لیے بابر اعظم اور شاہین شاہ آفریدی کو ٹی ٹوئنٹی اسکواڈ میں شامل نہیں کیا گیا، جبکہ حارث رؤف کو ایک بار پھر زیر غور نہیں لایا گیا۔ قومی ٹیم کے ٹی ٹوئنٹی اسکواڈ میں کپتان سلمان علی آغا، عبدالصمد، ابرار احمد، فہیم اشرف، فخر زمان، خواجہ محمد نافع اور محمد نواز شامل ہیں۔
دیگر کھلاڑیوں میں محمد سلمان مرزا، محمد وسیم جونیئر، نسیم شاہ، صاحبزادہ فرحان، صائم ایوب، شاداب خان، عثمان خان اور عثمان طارق بھی اسکواڈ کا حصہ ہیں۔ پاکستان کرکٹ ٹیم مرحلہ وار 4 اور 5 جنوری 2026 کو سری لنکا روانہ ہوگی۔
یہ بھی پڑھیں: دورہ سری لنکا کیلئے پاکستان ٹی ٹوئنٹی اسکواڈ کا اعلان جلد متوقع، شاداب خان کی ٹیم میں واپسی یقینی
پاکستان اور سری لنکا کے درمیان تین ٹی ٹوئنٹی انٹرنیشنل میچز کھیلے جائیں گے۔ یہ میچز 7، 9 اور 11 جنوری کو دمبولا میں منعقد ہوں گے۔ جاری کردہ معلومات کے مطابق یہ سیریز ورلڈ کپ کے لیے اسکواڈ کے انتخاب میں معاون ثابت ہوگی۔
دوسری جانب پاکستان کرکٹ بورڈ نے سری لنکا کے خلاف سیریز کے لیے ٹیم مینجمنٹ کا بھی اعلان کر دیا ہے۔ نوید اکرم چیمہ کو ٹیم منیجر مقرر کیا گیا ہے۔ مائیک ہیسن وائٹ بال کے ہیڈ کوچ ہوں گے، جبکہ ایشلے نوفکی بولنگ کوچ، محمد حنیف ملک بیٹنگ کوچ اور شین مکڈرموٹ فیلڈنگ کوچ کی ذمہ داریاں سنبھالیں گے۔
یہ بھی پڑھیں:انڈر 19 سہ ملکی سیریز،پاکستان نے سنسنی خیز مقابلہ میں افغانستان کو شکست دیدی
مزید برآں کلف ڈیکن فزیوتھراپسٹ، گرانٹ لوڈن اسٹرینتھ اینڈ کنڈیشننگ کوچ، طلحہٰ اعجاز ٹیم اینالسٹ اور سید نعیم احمد ٹیم کے میڈیا منیجر ہوں گے۔
