کراچی: (کشمیر ڈیجیٹل) 35 ویں نیشنل گیمز کا پہلا سونے کا تمغہ آرمی کی لیفٹیننٹ مصباح نے جیت لیا۔ لیفٹیننٹ مصباح نے شوٹنگ میں خواتین ایونٹ کے 50 میٹر رائفل مقابلے میں سونے کا تمغہ اپنے نام کیا، جس کے بعد نیشنل گیمز میں کھلاڑیوں کے درمیان میڈلز کے حصول کی جنگ شروع ہوگئی۔
باقاعدہ مقابلوں کے پہلے روز شوٹنگ ایونٹ میں 6 گولڈ میڈلز کے فیصلے ہوگئے، جس میں آرمی نے 4 اور نیوی نے 2 گولڈ میڈل جیتے۔ مردوں کے مقابلوں میں 10 میٹر ایئر پسٹل ٹیم ایونٹ میں پاکستان نیوی کے شوٹرز نے نیا قومی ریکارڈ قائم کیا۔ پاکستان نیوی کے شوٹرز شاہ رخ خان، ارسلان اور مدثر خان نے ٹیم ایونٹ میں شاندار کارکردگی دکھائی۔
10 میٹر ایئر پسٹل مینز میں 1721 سکور کے ساتھ پاکستان نیوی کے شوٹرز نے پاکستان آرمی کا سابقہ ریکارڈ توڑ دیا۔ سابقہ ریکارڈ پاکستان آرمی کے شوٹرز نے 1718 سکور کے ساتھ 2022ء کی نیشنل شوٹنگ چیمپئن شپ میں بنایا تھا۔
یہ بھی پڑھیں: بھارت نے جنوبی افریقہ کو تیسرے ون ڈے میچ میں 9 وکٹوں سے شکست دیدی
35 ویں نیشنل گیمز میں فٹبال کے مینز اور ویمن مقابلوں کا بھی آغاز ہو گیا۔ ویمن فٹبال میں آرمی نے خیبر پختونخوا کو 23-0 سے ہرایا، جبکہ سندھ اور واپڈا کے درمیان میچ 1-1 سے برابر رہا۔
نیشنل گیمز کے پہلے روز شوٹنگ اور فٹبال سمیت مختلف ایونٹس میں کھلاڑیوں کی مہارتیں دیکھنے کو ملیں، جس کے بعد میڈلز کے حصول کی دلچسپ مقابلہ بازی جاری ہے۔ 35 ویں نیشنل گیمز میں کھلاڑیوں کی یہ کارکردگی شائقین کے لیے دلچسپی اور جوش و خروش میں اضافہ کا سبب بنی ہے۔
