باغ( ڈیجیٹل نیوز )باغ میں موجودہ ریاستی صورتحال کے پیش نظر آزاد حکومت کے وزیر زراعت و لائیو سٹاک سردار میر اکبر خان کی زیر صدارت ضلعی آفیسران و بلدیاتی نمائندگان کا اجلاس میونسپل کارپوریشن باغ کے ہال میں منعقد ہوا ۔
اجلاس میں ڈپٹی کمشنر باغ راجہ صداقت، ایس ایس پی ریاض مغل،میئر میونسپل کارپوریشن میجر ریٹائرڈ سردار عبدالقیوم بیگ،چیئرمین ضلع کونسل سمیت جملہ ضلعی آفیسران و بلدیاتی نمائندگان نے شرکت کی۔ اجلاس میں ضلعی آفیسران نے موجودہ صورتحال پر بریفنگ دی ۔
اجلاس سے گفتگو کرتے ہوے وزیر حکومت سردار میر اکبر خان نے کہا کہ ریاست کے اندر افراتفری پھیلانے کی کوشش کی جا رہی ہے ہم سب کی ذمہ داری ہے شہریوں کو تحفظ فراہم کریں حکومت نے ہر ممکن کوشش کی کہ ریاست کے اندر یہ ماحول نہ بنے مگر کچھ لوگ ریاست کے اندر انتشار کو ہوا دے رہے ہیں جنہیں روکنا ہو گا ۔
ہم سب انتظامیہ کی پشت پر کھڑے ہیں ضلعی انتظامیہ امن و امان کی صورتحال کو یقینی بناے،بلدیاتی نمائندگان اپنے اپنے علاقوں میں موجود رہ کر عوام کو انتشار سے بچائیں یہ صرف انتظامیہ کی ذمہ داری نہیں بلکہ بطور ریاست کے شہری ہماری بھی ذمہ داری ہے کہ ہم سب ملکر اس صورتحال میں امن قائم رکھنے میں کردار ادا کریں ۔
اجلاس سے گفتگو کرتے ہوے ڈپٹی کمشنر راجہ صداقت نے کہا کہ تمام آفیسران و اہلکاران کی چھٹیاں منسوخ کر دی گئی ہیں تمام لوگ دفاتر میں موجود رہیں گے تاکہ کہ کسی بھی ہنگامی صورتحال میں بروقت کاروائی کی جا سکے۔
تمام محکمہ جات اپنی ذمہ داریاں پوری کریں امن و امان کی صورتحال کو برقرار رکھنا ہم سب کی ذمہ داری ہے ہمارا فرض ہے کہ عوام کے جان و مال کا تحفظ یقینی بنائیں ۔
مزید یہ بھی پڑھیں:جماعت اسلامی آزاد کشمیر کا عوامی ایکشن کمیٹی کی حمایت سے دستبرداری کا اعلان
اجلاس سے گفتگو کرتے ہوے ایس ایس پی ریاض مغل نے کہا کہ ہر ممکن کوشش کریں گے کہ بغیر کسی سختی کے حالات کو کنٹرول رکھا جاے اگر کسی جگہ قانون ہاتھ میں لیا گیا تو پھر قانون اپنا راستہ بناے گا ریاست کے اندر انتشار پھیلانے کی اجازت نہیں دی جا سکتی ۔
پر امن احتجاج ہر ایک کا حق ہے مگر کسی بھی سطح پر پر تشدد ہونے کی اجازت نہیں ہو گی پولیس امن و امان کی صورتحال کو ہر صورت برقرار رکھے گی۔
اجلاس سے گفتگو کرتے ہوئے چیئرمین ضلع کونسل سردار آصف نے کہا کہ بلدیاتی نمائندگان موجودہ صورتحال میں حکومت اور انتظامیہ کیساتھ کھڑے ہیں موجودہ افراتفری کے ماحول کے پیچھے جو مقاصد ہیں وہ ریاست کے مفاد میں نہیں ہیں ۔
ریاست کا ہر باشعور شہری اس افراتفری کے خلاف ہے اور چند لوگوں کی من مانی کو نہیں مانا جاے گا ریاست اپنی رٹ قائم کرے بلدیاتی نمائندگان پشت پر کھڑے ہوں گے۔
اجلاس سے گفتگو کرتے ہو ئے میئر میونسپل کارپوریشن سردار عبدالقیوم بیگ نے کہا کہ عوام کی املاک اور جان کا تحفظ ہر صورت یقینی بنایا جاے افراتفری اور انتشار کی ریاست میں کوئی گنجائش نہیں ہے ۔
مسائل کے نام پر ریاست کو پرغمال بنانے کی اجازت نہیں پر امن احتجاج سب کا حق ہے مگر سڑکیں بند کر کے عوام جو اذیت میں ڈالنے والوں کو بازور بازو روکنا ہو گا ریاست میں افراتفری پھیلانے والوں کے مذموم مقاصد ہیں جو ریاست کے مفاد میں نہیں ۔
اجلاس میں بلدیاتی نمائندگان اور آفیسران نے تجاویز پیش کیں جن پر وزیر حکومت اور ڈپٹی کمشنر نے اداروں کو عمدرآمد کی ہدایات جاری کیں ۔
