پشاور(کشمیر ڈیجیٹل )خیبرپختونخوا حکومت نے حالیہ سیلاب سے متاثرہ افراد کی امداد اور بحالی کے لیے سرکاری اور نیم سرکاری ملازمین کی تنخواہوں سے کٹوتی کرنے کا فیصلہ کیا ہے۔ یہ کٹوتی اگست 2025 کی تنخواہوں سے کی جائے گی۔
محکمہ خزانہ کے مطابق اس فیصلے کا اطلاق صوبے کے تمام سرکاری، نیم سرکاری اور خود مختار اداروں کے ملازمین پر ہوگا۔
گریڈ 17 اور اس سے اوپر کے افسران کی دو دن جبکہ گریڈ 1 سے 16 کے ملازمین کی ایک دن کی بنیادی تنخواہ کاٹی جائے گی۔
محکمہ خزانہ نے اس سلسلے میں باضابطہ اعلامیہ جاری کیا ہے اور بتایا ہے کہ یہ فیصلہ صوبائی کابینہ کے حالیہ اجلاس میں متفقہ طور پر کیا گیا۔ اس کا مقصد سیلاب متاثرین کے لیے ہنگامی فنڈز اکٹھا کرنا ہے تاکہ ریلیف اور بحالی کے اقدامات تیز کیے جا سکیں۔
اعلامیے کے مطابق ان فنڈز سے متاثرہ خاندانوں کو عارضی رہائش، خوراک، طبی امداد اور دیگر بنیادی سہولیات فراہم کرنے کے ساتھ بحالی کے اقدامات کو بھی فوری طور پر یقینی بنایا جائے گا۔
واضح رہے کہ خیبرپختونخوا کے مختلف اضلاع میں حالیہ بارشوں اور فلش فلڈ کے باعث انسانی جانوں کے ضیاع کے ساتھ مکانات، سڑکیں، کھیت اور بنیادی ڈھانچے کو شدید نقصان پہنچا ہے۔
مزید یہ بھی پڑھیں:ہانگ کانگ فیلوشپ 2026-27 ،پاکستانی طلباء کیلئے بڑی خبرآگئی
