اسلام آباد(کشمیر ڈیجیٹل)محکمہ موسمیات نے پیش گوئی کی ہے کہ 23 سے 27 اگست کے دوران ملک کے مختلف حصوں میں بارشوں کا نیا سلسلہ شروع ہونے کا امکان ہے۔
محکمہ موسمیات کے مطابق 22 اگست سے مون سون ہوائیں شدت کے ساتھ بالائی علاقوں میں داخل ہوں گی جو بحیرہ عرب اور خلیج بنگال سے ملک میں داخل ہوں گی۔
بارشوں کے نتیجے میں پہاڑی علاقوں میں لینڈ سلائیڈنگ جبکہ نشیبی علاقوں میں پانی بھرنے کے خدشات ظاہر کیے گئے ہیں۔
23 سے 26 اگست تک گلگت بلتستان اور آزاد کشمیر میں تیز بارشوں کے ساتھ ژالہ باری بھی متوقع ہے۔
محکمہ موسمیات کے مطابق گلگت بلتستان ، کشمیر ،راولپنڈی، لاہور، گوجرانوالہ، سیالکوٹ، نارووال، پشاور، نوشہرہ، مردان، ایبٹ آباد، مانسہرہ، دیر، کے علاقوں میں فلیش فلڈنگ کا خدشہ موجود ہے۔
پیشگوئی کے مطابق 23 سے 27 اگست تک اسلام آباد، راولپنڈی،پختونخوا کے شہروں پشاور، چارسدہ، نوشہرہ، مردان، کوہاٹ، بنوں، لکی مروت، ڈیرہ اسماعیل خان اور باجوڑ میں بارشوں کا سلسلہ جاری رہنے کا امکان ہے۔
لاہور، گوجرانوالہ، سیالکوٹ، نارووال، فیصل آباد اور سرگودھا میں بارشیں ہوں گی۔ اسی دوران خوشاب، میانوالی، بھکر، لیہ، ڈیرہ غازی خان اور ملتان میں بھی شدید بارشوں کا امکان ہے۔
بلوچستان کے مختلف اضلاع بشمول کوئٹہ، ژوب، شیرانی، بارکھان، خضدار، قلعہ عبداللہ، قلعہ سیف اللہ، پنجگور اور کیچ میں 23 سے 25 اگست کے دوران بارش کا امکان ظاہر کیا گیا ہے۔
محکمہ موسمیات نے کراچی میں بھی 23 سے 25 اگست تک بارش کی پیشگوئی کی ہے جبکہ سکھر، لاڑکانہ، شہید بینظیر آباد، دادو، جیکب آباد اور جامشورو میں بھی بارشیں متوقع ہیں۔
اسی عرصے کے دوران بھکر، لیہ، مظفرگڑھ، ڈیرہ غازی خان، راجن پور اور رحیم یار خان میں بھی بارشوں کا سلسلہ جاری رہنے کا امکان ہے۔
ادارے نے عوام کو ہدایت کی ہے کہ وہ احتیاطی تدابیر اختیار کریں اور غیر ضروری سفر سے حتی الامکان گریز کریں۔
مزید یہ بھی پڑھیں:راولاکوٹ، طلباء تنظیموں کا گرفتار نوجوانوں کی رہائی کا مطالبہ،ریاست گیراحتجاج کا اعلان
