ایشیا کپ 2025 کے لیے بھارتی سکواڈ کا اعلان کردیا گیا ہے، سوریا کمار یادو بھارتی ٹیم کی کمان سنبھالیں گے جبکہ شبمن گل کی بطور نائب کپتان ٹیم میں واپسی ہوئی ہے۔
انٹرنیشنل کرکٹ کونسل (آئی سی سی) کے مطابق دفاعی چیمپئن بھارت نے رواں برس ستمر میں متحدہ عرب امارات (یواے ای) میں شیڈول میں ٹی 20 ایشیا کپ کیلئے15 رکنی اسکواڈ کا اعلان کر دیا ہے۔
سوریا کمار یادو آئندہ ماہ ایشیا کپ میں بھارت کی قیادت کریں گے جہاں ٹیم نویں مرتبہ ٹائٹل جیتنے کے عزم کے ساتھ میدان میں اترے گی۔
گزشتہ سال آئی سی سی مینز ٹی 20 ورلڈ کپ جیتنے والی ٹیم کے مقابلے میں اس مرتبہ اسکواڈ میں کئی اہم تبدیلیاں کی گئی ہیں جبکہ کچھ بڑے ناموں کی واپسی سے ٹیم مزید مضبوط ہوگئی ہے۔
یہ بھی پڑھیں: ایشیا کپ،پاک بھارت میچ میں10 سیکنڈز کے ٹی وی اشتہار کےحیران کن ریٹ سامنے آگئے
تیز گیند باز جسپریت بمراہ 2024 کے ٹی 20 ورلڈ کپ کے بعد پہلی بار بھارت کی وائٹ بال کرکٹ میں واپس آ رہے ہیں۔
وہ گزشتہ سال ٹی ٹوئنٹی ورلڈ کپ کے فائنل کے بعد صرف ٹیسٹ کرکٹ میں نظر آئے، انہیں محدود اوورز کی سیریز سے آرام دیا گیا تھا اور انجری کے باعث آئی سی سی چیمپئنز ٹرافی سے بھی باہر رہے۔
بھارت کا اسکواڈ
بھارتی ٹی میں سوریا کمار یادو (کپتان)، شبمن گل، ابھیشیک شرما، تلک ورما، ہاردک پانڈیا، شیوم دوبے، جیتیش شرما، اکشر پٹیل، جسپریت بمراہ، ورون چکرورتی، ارشدیپ سنگھ، کلدیپ یادو، سنجو سیمسن، ہرشت رانا اور رنکو سنگھ شامل ہیں۔
ریزرو کھلاڑی
ریزرو کھلاڑیوں میں پرسیدھ کرشنا، واشنگٹن سندر، ریان پراگ، دھروو جریال اور یشسوی جیسوال شامل ہیں۔
سلیکٹرز نے بیٹنگ لائن میں نوجوان کھلاڑیوں ابھیشیک شرما، تلک ورما اور رنکو سنگھ پر اعتماد ظاہر کیا ہے، جنہوں نے گزشتہ ایک سال کے دوران شاندار کارکردگی دکھاتے ہوئے اپنی جگہ بنائی۔
ان کے ساتھ سوریا کمار یادو کا تجربہ ٹیم کو سہارا دے گا جبکہ شبمن گل بھی ٹیم میں واپس آئے ہیں جو ایک سال سے زائد عرصے بعد بھارت کی ٹی ٹوئنٹی ٹیم کا حصہ بنے ہیں، وہ آخری بار سری لنکا کے خلاف سیریز میں نظر آئے تھے۔
یہ بھی پڑھیں: ایشیاکپ کیلئے شاندار سکواڈ تشکیل دیا ہے،ہیڈکوچ مائیک ہیسن کا دعویٰ
سنجو سیمسن کو بھارتی وکٹ کیپر بلے باز کے طور پر ٹیم میں شامل کیا گیا ہے جبکہ جیتیش شرما بیک اپ وکٹ کیپر کے طور پر دستیاب ہوں گے۔ دونوں کھلاڑی ایک سال سے زائد عرصے بعد دوبارہ ٹی ٹوئنٹی اسکواڈ کا حصہ بنے ہیں۔
یادرہے کہ ایشیاکپ کا آغاز 9 ستمبر سے ہوگا جبکہ بھارت اپنی مہم 10 ستمبر کو یو اے ای کے خلاف دبئی میں شروع کرے گا۔14ستمبر کو پاکستان اوربھارت کا مقابلہ ہوگاجبکہ فائنل28ستمبر کو ہوگا۔
