(کشمیر ڈیجیٹل) یوٹیوب نے اعلان کیا ہے کہ 13 اگست 2025 سے صارفین کی عمر کے تعین کے لیے مصنوعی ذہانت (اے آئی) پر مبنی نیا فیچر متعارف کرایا جائے گا، جس کا مقصد عمر کے مطابق محفوظ اور موزوں تجربہ فراہم کرنا ہے۔
کمپنی کے مطابق یہ مشین لرننگ ٹیکنالوجی ابتدائی طور پر امریکا میں محدود صارفین پر آزمائی جائے گی، جو صارفین کی سرچ ہسٹری، دیکھی جانے والی ویڈیوز کی کیٹیگریز اور اکاؤنٹ کی عمر جیسے عوامل کی بنیاد پر عمر کا تخمینہ لگائے گی۔ اگر سسٹم کسی صارف کو کم عمر قرار دیتا ہے تو اس پر خودکار طور پر عمر سے متعلق پابندیاں عائد ہو جائیں گی۔
کمپنی نے وضاحت کی کہ اگر اے آئی درست عمر کا تعین نہ کر سکے تو صارف سرکاری شناختی کارڈ یا کریڈٹ کارڈ کے ذریعے اپنی عمر ثابت کر سکے گا کہ وہ 18 سال سے زائد عمر کا ہے۔
یہ بھی پڑھیں: حج درخواستیں جمع کرانے کا دوسرا مرحلہ آج سے شروع، غیر رجسٹرڈ افراد بھی شامل
یوٹیوب کا کہنا ہے کہ آزمائشی مرحلے کے نتائج کی بنیاد پر یہ فیچر بتدریج دیگر ممالک میں بھی متعارف کرایا جائے گا، تاکہ صارفین کو بہتر تحفظ فراہم کیا جا سکے، چاہے ان کے اکاؤنٹ میں درج تاریخ پیدائش کچھ بھی ہو۔ تاہم، یہ فیچر کم عمر صارفین کے لیے کچھ پابندیوں کا باعث بن سکتا ہے۔
