(کشمیر ڈیجیٹل) فیلڈ مارشل سید عاصم منیر نے چین کے سرکاری دورے کے دوران بیجنگ میں چین کی اعلیٰ سیاسی و عسکری قیادت سے ملاقاتیں کیں جن میں علاقائی استحکام، کثیرالجہتی تعاون اور دفاعی روابط کے فروغ پر تفصیلی تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق ان ملاقاتوں میں پاک چین آہنی اسٹریٹجک شراکت داری کی ازسر نو توثیق کی گئی۔ فیلڈ مارشل سید عاصم منیر نے چین کے نائب صدر ہان ژینگ اور وزیر خارجہ وانگ ژی سے بھی ملاقاتیں کیں جن میں علاقائی و عالمی سیاسی صورتحال اور سی پیک کے تحت رابطے کے منصوبوں پر تبادلہ خیال کیا گیا۔
آئی ایس پی آر کے مطابق ملاقاتوں میں مشترکہ جغرافیائی سیاسی چیلنجز سے نمٹنے کے لیے مربوط حکمت عملی، خودمختاری، کثیرالجہتی تعاون اور علاقائی استحکام پر اتفاق رائے ہوا۔ فریقین نے دوطرفہ تعلقات کی مضبوطی پر اطمینان کا اظہار کیا اور مشترکہ عزم کا اعادہ کیا۔
فیلڈ مارشل عاصم منیر کی چین کی عسکری قیادت بشمول وائس چیئرمین سینٹرل ملٹری کمیشن جنرل ژانگ یوشیا، پیپلز لبریشن آرمی کے پولیٹیکل کمشنر جنرل چن، اور چیف آف اسٹاف لیفٹیننٹ جنرل کائی ژائی جن سے بھی ملاقات ہوئی۔
ان ملاقاتوں میں دفاعی و سکیورٹی تعاون، انسداد دہشتگردی، مشترکہ تربیت، دفاعی جدیدکاری اور ادارہ جاتی روابط پر تبادلہ خیال کیا گیا۔ ہائبرڈ اور سرحد پار خطرات سے نمٹنے کے لیے آپریشنل ہم آہنگی اور اسٹریٹجک کوآرڈینیشن کو مزید مضبوط بنانے پر بھی زور دیا گیا۔
یہ بھی پڑھیں: کشمیری مہاجرین کو درپیش سنگین مسائل سے متعلق پارلیمانی کمیٹی میں تفصیلی بریفنگ
چینی عسکری قیادت نے جنوبی ایشیا میں امن و استحکام کے لیے افواجِ پاکستان کے کردار کو سراہتے ہوئے پاک چین دفاعی شراکت داری پر بھرپور اعتماد کا اظہار کیا۔ فیلڈ مارشل عاصم منیر نے چین کی مسلسل حمایت پر شکریہ ادا کیا اور تمام شعبوں میں فوجی تعاون کے فروغ کے عزم کا اعادہ کیا۔