جکارتہ (ویب ڈیسک) انڈونیشیا کے 11 سالہ بچے ریان ارکان ڈھیکا نے کشتی کی نوک پر دلکش انداز میں رقص کر کے دنیا بھر میں دھوم مچا دی۔
ریان، جو انڈونیشیا کے صوبہ ریاؤ کے علاقے کوانتن سنگینگریجنسی سے تعلق رکھتا ہے اور پانچویں جماعت کا طالبعلم ہے، مقامی ثقافتی میلے “پاکو جالور” کے دوران ایک کشتی ریس میں “توکنگ تاری” کے طور پر حصہ لے رہا تھا — یہ وہ بچہ ہوتا ہے جو کشتی کے اگلے حصے پر کھڑا ہو کر رقص کے ذریعے چپو چلانے والوں کا حوصلہ بڑھاتا ہے۔
ریان نے روایتی “تلوق بلنگا” لباس، ریاؤ اسٹائل کی پگڑی اور سن گلاسز پہن کر ایسے اعتماد کے ساتھ رقص کیا کہ اس کی ویڈیو سوشل میڈیا پر وائرل ہو گئی۔ ٹک ٹاک پر شیئر ہونے والی یہ ویڈیو دیکھتے ہی دیکھتے دنیا بھر میں دیکھی گئی۔
ریان بچپن سے ہی “توکنگ تاری” کے طور پر پرفارم کر رہا ہے اور اس نے بتایا کہ یہ ڈانس اس نے خود ہی بنایا، جو لمحاتی جذبے سے پیدا ہوا تھا۔
اس کے انداز کو ’اورا فارمنگ‘ کا نام دیا گیا، جس کا مطلب ہے ایسا انسان جو پُراعتماد اور دلکش شخصیت رکھتا ہو۔ ریان کے ڈانس انداز کو بعد میں عالمی کھلاڑیوں جیسے امریکی فٹبال اسٹارز نے بھی کاپی کیا۔
انڈونیشیا کے وزیر ثقافت نے ریان کے توازن اور رقص کی مہارت کو سراہا، جبکہ گورنر ریاؤ نے اسے صوبے کا سیاحتی سفیر مقرر کیا۔
11-year-old Indonesian boy Rayyan Arkan Dhika going viral for his boat racing dance, where he danced confidently at the bow of a racing canoe.#jalursport #jalur #viralvideo #rayyanarkandhika #rayyan #boatrace #indonesia #dance #viraldance #viralvideo pic.twitter.com/vsNhI8PPcQ
— Manchh (@Manchh_Official) July 14, 2025
ریان نے بی بی سی انڈونیشیا سے گفتگو کرتے ہوئے کہا: “میں بہت خوش ہوں، کبھی سوچا نہیں تھا کہ گورنر سے ملوں گا۔”
ریان ارکان ڈھیکا اب انڈونیشیا کے ایک مقامی فنکار سے بڑھ کر عالمی سطح پر مشہور چہرہ بن چکا ہے، جس نے اپنی ثقافت کو دنیا کے سامنے منفرد انداز میں پیش کیا۔
