مظفرآباد (کشمیرڈیجیٹل نیوز) آزاد جموں و کشمیر کا الیکشن ٹربیونل سابق حکومتی وزیر سردار قمر زمان خان کی جانب سے وزیر زراعت و لائیو سٹاک سردار میر اکبر کے خلاف دائر شرقی باغ ووٹ دھاندلی کیس میں آج 16 جولائی کو اپنا فیصلہ سنائے گا ۔
2021 کے عام انتخابات میں سردار میر اکبر نے سردار قمر زمان خان کو شکست دی تھی۔ پیپلز پارٹی کے رہنما سردار قمر زمان خان نے سردار میر اکبر پر دھاندلی کا الزام لگاتے ہوئے اس الیکشن کو چیلنج کیا تھا ۔ پیر کو الیکشن ٹربیونل نے فریقین کے دلائل مکمل ہونے کے بعد اپنا فیصلہ محفوظ کر لیا تھا ۔
مارچ 2025 میں آزاد کشمیر ہائیکورٹ نے الیکشن ٹریبونل کو درخواست پر دو ماہ میں فیصلہ کرنے کا حکم دیا تھا ۔ 2021 کے انتخابات میں سردار قمر زمان خان اور سردار میر اکبر کے درمیان سخت مقابلہ ہوا تھا۔ کچھ پولنگ اسٹیشنوں پر بوتھوں کو جلا دیا گیا، جس کے بعد دوبارہ پولنگ ہوئی ۔
یہ بھی پڑھیں:بھارت فالس فلیگ آپریشن سے دنیا کی آنکھوں میں دھول نہیں جھونک سکتا، سردار قمرالزمان خان
دوبارہ پولنگ میں سردار قمر زمان خان سردار میر اکبر سے صرف 296 ووٹوں سے ہار ے تھے۔90 فیصد سے زیادہ ووٹ ڈالے گئے؟بہت سے لوگوں کے لیے حیرت کی بات یہ ہے کہ حلقہ شرقی باغ کے کچھ پولنگ اسٹیشنوں پر 90 فیصدسے زیادہ ووٹ ڈالے گئے۔
سردار میر اکبر پاکستان تحریک انصاف کے ٹکٹ پر جبکہ سردار قمر زمان پاکستان پیپلز پارٹی کے ٹکٹ پر الیکشن لڑے تھے۔ اگر دھاندلی ثابت ہو جاتی ہے تو سردار میر اکبر دوبارہ انتخابات کا باعث بن سکتے ہیں جس کے نتیجے میں آزاد جموں و کشمیر کے سابق وزیر اعظم سردار تنویر الیاس بھی پی پی پی کے ٹکٹ پر اسمبلی میں واپسی کے لیے الیکشن لڑ سکتے ہیں ۔
سابق وزیراعظم تنویر الیاس کی پاکستان پیپلز پارٹی میں شمولیت اور سردار قمر زمان خان کے ساتھ ان کے معاملات طے پا جانے کے بعد اب قوی امکان ہے کہ حلقے میں دوبارہ الیکشن ہونے کی صورت میں سردار تنویر الیاس پاکستان پیپلز پارٹی کے امیدوار ہوں گے۔
یہ بھی پڑھیں:باغ میں شجرکاری مہم کا آغاز، سرکاری اراضی پر کئے گئے تمام قبضے ختم کرا دیئے، سردار میراکبر
سردار تنویر الیاس نے وسطی باغ کے حلقے سے گزشتہ الیکشن لڑا اور جیتا لیکن بعد میں ہائیکورٹ نے انہیں ایک متنازع تقریر کیس میں نااہل قرار دے دیا۔ بعد ازاں سپریم کورٹ نے ان کی نااہلی کو کالعدم قرار دے دیا۔دوسری جانب سردار میر اکبر کے پاس بھی فیصلے کو سپریم کورٹ میں چیلنج کرنے کا اختیار ہوگا۔
