وادیِ نیلم میں پاک فوج، پولیس، مقامی لوگوں اور ریسکیو اداروں نے ایک انتہائی مشکل اور اپنی نوعیت کے منفرد ریکوری آپریشن کو کامیابی کے ساتھ پایہِ تکمیل تک پہنچا دیا ہے۔
مقبوضہ کشمیر میں لائن آف کنٹرول (ایل او سی) کی دوسری جانب پھنسی ایک خاتون کی میت (ڈیڈ باڈی) کو کامیابی سے ریکور کر کے واپس پاکستان لے آیا گیا ہے۔
حادثے کی تفصیلات اور رابطہ کاری:
تفصیلات کے مطابق آزاد کشمیر کے سرحدی گاؤں نگدر سے تعلق رکھنے والی ایک خاتون ناگہانی حادثے کے نتیجے میں دریائے نیلم کے تیز بہاؤ میں بہہ کر لائن آف کنٹرول پار مقبوضہ کشمیر کی حدود میں چلی گئی تھی۔ خاتون کی لاش کی واپسی کے لیے پاکستان آرمی کے ذریعے انڈین آرمی سے باقاعدہ رابطہ قائم کیا گیا اور میت کی ریکوری کی بابت اجازت حاصل کی گئی۔
یہ بھی پڑھیں: لائن آف کنٹرول پر گولہ باری میں ٹانگ گنوانے والے ڈاکٹر الطاف حسین نےپی ایچ ڈی مکمل کر لی
مشترکہ آپریشن اور میت کی ریکوری:
اجازت ملنے کے بعد بدھ 14 اکتوبر 2026ء کی صبح ڈسٹرکٹ ڈیزاسٹر مینجمنٹ اتھارٹی (DDMA) نیلم اور کشمیر بوٹنگ کلب شاردہ کے اہلکاروں نے ایک مشترکہ اور انتہائی حساس آپریشن شروع کیا۔ پاک فوج، پولیس اور مقامی شہریوں کی فعال اور بھرپور مدد سے ڈی ڈی ایم اے اور بوٹنگ کلب کے اہلکاروں نے بحفاظت سرحد پار سے میت کو ریکور کر لیا۔
ضلعی انتظامیہ کی ہدایات اور خراجِ تحسین
ڈپٹی کمشنر / چیئرمین ڈی ڈی ایم اے نیلم نے انسانی بنیادوں پر ہونے والے اس آپریشن کے لیے تمام اداروں کو ہر ممکنہ تعاون فراہم کرنے کی خاص ہدایت کر رکھی تھی۔ ریسکیو ٹیموں اور تمام متعلقہ اداروں کے اس باہمی تعاون، تیز رفتار اور منفرد رسپانس کو عوام کی جانب سے خراجِ تحسین پیش کیا جا رہا ہے۔
