آزاد جموں و کشمیر انٹرمیڈیٹ و ثانوی تعلیمی بورڈ میرپور کی طرف سے انٹرمیڈیٹ کمپوزٹ فرسٹ اینول امتحان 2026 کے نتائج کے اجرا کے حوالے سے باضابطہ شیڈول جاری کر دیا گیا ہے۔
بورڈ کے مطابق ان امتحانات کے نتائج کا باقاعدہ اعلان آج مورخہ 22 ستمبر 2026 کو شام ٹھیک 4 بجے کیا جائے گا، جبکہ اس سلسلے میں ایک اہم پریس کانفرنس کا انعقاد دوپہر 3 بجے ہوگا۔
نتائج کی دستیابی اور رزلٹ کارڈز کا حصول:
تعلیمی بورڈ کی جاری کردہ پریس ریلیز کے مطابق تمام طلبا اپنے نتائج بورڈ کی آفیشل ویب سائٹ www.ajkbise.net پر باآسانی دیکھ سکیں گے اور وہیں سے اپنے تفصیلی رزلٹ کارڈز بھی ڈاؤن لوڈ کرنے کے قابل ہوں گے۔
بورڈ نے واضح کیا ہے کہ باقاعدہ تعلیمی اداروں سے تعلق رکھنے والے تمام امیدواروں کے رزلٹ کارڈز ان کے متعلقہ اداروں کے سرکاری ای میل ایڈریس پر ارسال کیے جائیں گے۔ اس کے برعکس، پرائیویٹ حیثیت میں امتحان دینے والے امیدواروں کے رزلٹ کارڈز ان کے اپنے فراہم کردہ ای میل ایڈریس پر ہی روانہ کیے جائیں گے۔
یہ بھی پڑھیں: آزاد کشمیر تعلیمی بورڈ میرپور نے انٹرمیڈیٹ سال اول کے طلباء کی رجسٹریشن کا شیڈول جاری کر دیا
پیپرز کی ری چیکنگ کا طریقہ کار اور فیس:
وہ تمام امیدوار جو اپنے نتائج سے مطمئن نہ ہوں اور ری چیکنگ کروانا چاہتے ہوں، وہ نتائج کا کارڈ جاری ہونے کے بعد اگلے 45 دنوں کے اندر اندر اپنے مقررہ درخواست فارم کے ذریعے اپلائی کر سکیں گے۔ بورڈ کی جانب سے فی پرچہ ری چیکنگ فیس 1500 روپے مقرر کی گئی ہے۔
امیدوار اس فیس کو موبائل یا انٹرنیٹ بینکنگ کے علاوہ معروف ڈیجیٹل پلیٹ فارمز بشمول ایچ بی ایل کنیکٹ (HBL Konnect)، جیز کیش (JazzCash) اور ایزی پیسہ (EasyPaisa) کے ذریعے باآسانی جمع کرا سکتے ہیں۔ اس کے علاوہ یہ بھی لازمی قرار دیا گیا ہے کہ آن لائن ری چیکنگ کی درخواست جمع کرانے کے بعد اگلے 15 دنوں کے اندر اصل درخواست اور فیس کی رسید بورڈ آفس میں لازمی جمع کروائی جائے۔
