عالمی شہرت یافتہ برقی اور NEVبنانے والے ادارے بی وائی ڈی (BYD) نے میگا موٹر کمپنی کے اشتراک سے لاہور ایکسپو سینٹر میں جاری پاک آٹو شو کے موقع پر اپنی نئی گاڑیوں کا شاندار لائن اَپ متعارف کرا دیا ہے۔ اس نمائش کا سب سے اہم اور نمایاں پہلو ’’بی وائی ڈی سیلین 6‘‘ (BYD SEALION 6) ہے، جسے پاکستان میں کمپنی کی پہلی مقامی طور پر اسمبل ہونے والی گاڑی بنایا جائے گا۔
مقامی اسمبلنگ کا آغاز اور شاندار فیچرز:
کمپنی کے اعلان کے مطابق بی وائی ڈی سیلین 6 کی مقامی سطح پر پیداوار اور اسمبلنگ کا آغاز رواں سال کی چوتھی سہ ماہی (Q4 2026) میں متوقع ہے۔ یہ ماڈل بی وائی ڈی کی جدید ترین سپر ڈی ایم آئ ٹیکنالوجی سے لیس ہے، جو برقی ڈرائیونگ کے تجربے کو پلگ اِن ہائبرڈ کی لچک کے ساتھ یکجا کرتی ہے۔ یہ گاڑی ایک بار چارج اور فل ٹینک پر مجموعی طور پر 1,100 کلومیٹر تک کی طویل ڈرائیونگ رینج فراہم کرنے کی صلاحیت رکھتی ہے۔
یہ بھی پڑھیں: 57سالہ کار لفٹر گرفتار،نمازی بن کر گاڑیاں چراتا رہا اور فروخت کرتا رہا
پاک آٹو شو میں بی وائی ڈی کے اس خصوصی لائن اَپ میں سیلین 6 کے علاوہ بی وائی ڈی ایٹو ٹو (BYD ATTO 2)، آؤٹ بیک اورنج رنگ میں بی وائی ڈی شارک 6 اینیورسری ایڈیشن، اور بی وائی ڈی کا لگژری برانڈ ڈینزا (DENZA) کا ماڈل B8 بھی شامل کیا گیا ہے۔
قیادت کے خیالات اور مارکیٹ کا ارتقا:
بی وائی ڈی پاکستان کے کنٹری ہیڈ لی جیان (Lei Jian) کا کہنا ہے کہ پاکستان میں نئی توانائی کی نقل و حرکت کے حوالے سے زبردست صلاحیت موجود ہے، اور یہاں آنے کے بعد صارفین کی جانب سے ملنے والے مثبت ردعمل نے ملک میں کمپنی کے طویل المدتی وژن کو مزید تقویت دی ہے۔ سیلین 6 کی مقامی اسمبلنگ اس سمت میں ایک سنگِ میل کی حیثیت رکھتی ہے۔
میگا موٹر کمپنی کے وی پی سیلز اینڈ اسٹریٹجی دانش خالق نے اس موقع پر اظہارِ خیال کرتے ہوئے کہا کہ پاکستانی صارفین نئی عالمی ٹیکنالوجی کو اپنانے کے لیے مکمل طور پر تیار ہیں۔ مقامی اسمبلنگ کی طرف منتقلی سے نہ صرف پورٹ فولیو میں وسعت آئے گی بلکہ یہ پاکستان میں مستقبل کی آٹوموبائل انڈسٹری کی تشکیل میں بھی مددگار ثابت ہوگی۔
