پاکستان کے مایہ ناز اسٹار ایتھلیٹ ارشد ندیم ورلڈ ایتھلیٹکس الٹیمیٹ چیمپیئن شپ کے جیولن تھرو ایونٹ میں پانچویں نمبر پر رہتے ہوئے میڈل جیتنے میں ناکام ہو گئے ہیں۔
سری لنکا کے رمیش پاتھیرنگا نے چوتھی کوشش میں شاندار 91.09 میٹر تھرو پھینک کر ٹائٹل جیت لیا۔
یہ بھی پڑھیں:کامن ویلتھ گیمز،ارشد ندیم نے گولڈ میڈل نہ جیتنے کی حیرت انگیز وجہ بتا دی
دنیا کے ٹاپ 8 ایتھلیٹس کے اس کڑے مقابلے میں ارشد کی جانب سے کی گئی 81.79 میٹر کی تھرو انہیں پوڈیم تک پہنچانے کے لیے ناکافی ثابت ہوئی۔
جیولن تھرو کا یہ مقابلہ انتہائی سنسنی خیز رہا جس میں دنیا بھر سے ٹاپ 8 مایہ ناز اور ایلیٹ کھلاڑیوں نے حصہ لیا۔
مقابلے کے آغاز میں ارشد ندیم کی کارکردگی کچھ دباؤ کا شکار نظر آئی اور انہوں نے اپنے پہلے راؤنڈ میں 74.42 میٹر کی تھرو کی۔
دوسری جانب ان کے مدمقابل کھلاڑیوں نے شروع سے ہی شاندار کھیل کا مظاہرہ کیا۔ جرمنی کے نامور کھلاڑی جولین نے 85.89 میٹر کی تھرو کر کے شائقین کو محظوظ کیا، جبکہ گریناڈا کے عالمی شہرت یافتہ ایتھلیٹ اینڈرسن پیٹرز نے 89.18 میٹر کی زبردست تھرو کے ساتھ اپنی سبقت قائم کر دی۔
مقابلے کے دوسرے راؤنڈ میں پاکستانی ایتھلیٹ نے شاندار کم بیک کرنے کی کوشش کی اور 79.66 میٹر کے فاصلے تک اپنا نیزہ پھینکا۔
تاہم عالمی سطح کے اس ایونٹ میں مسابقت انتہائی سخت تھی۔ اسی دوران ٹرینیڈاڈ اینڈ ٹوباگو کے مایہ ناز جیولن تھروور کیشورن والکوٹ نے بھی بہترین فارم کا مظاہرہ کرتے ہوئے 85.41 میٹر کی شاندار تھرو ریکارڈ کروائی، جس نے مقابلے کو مزید دلچسپ اور کٹھن بنا دیا۔
اپنی تیسری کوشش میں ارشد ندیم نے بھرپور طاقت اور تکنیک کا استعمال کرتے ہوئے 81.79 میٹر کی تھرو کی۔
یہ بھی پڑھیں:پاکستانی ایتھلیٹ مسعود خان کا شاندار کارنامہ، پشاور سے اسکردو تک 800 کلومیٹر دوڑ کر عالمی ریکارڈ قائم کر دیا
یہ کارکردگی رواں سیزن میں ان کی اب تک کی سب سے بہترین تھرو تھی، لیکن دیگر ٹاپ ایتھلیٹس کی غیر معمولی فارم اور بڑے فاصلوں کی وجہ سے یہ تھرو انہیں میڈل کی دوڑ میں برقرار رکھنے کے لیے کافی ثابت نہ ہو سکی۔
اس طرح پاکستان کا یہ فخر پانچویں نمبر پر رہتے ہوئے ایونٹ سے باہر ہو گیا۔
