پاکستان انڈر 19 کرکٹ ٹیم اہم دورہ انگلینڈ کے لیے لاہور کے علامہ اقبال انٹرنیشنل ایئرپورٹ سے روانہ ہو گئی ہے۔ قومی جونیئر ٹیم لاہور سے براستہ دبئی انگلینڈ پہنچے گی، جہاں وہ میزبان انگریز ٹیم کے خلاف تاریخی اور اہم سیریز میں پاکستان کی نمائندگی کرے گی۔
اس دورے کے دوران دونوں ممالک کی جونیئر ٹیموں کے درمیان ایک یوتھ ٹیسٹ اور چار یوتھ ون ڈے انٹرنیشنل میچز پر مشتمل سیریز کھیلی جائے گی۔ اس سیریز کا مقصد جونیئر کھلاڑیوں کو بین الاقوامی سطح پر بہترین موقع اور تجربہ فراہم کرنا ہے تاکہ وہ آنے والے دنوں میں قومی ٹیم کی نمائندگی کے لیے تیار ہو سکیں۔
یہ بھی پڑھیں: ہاکی نیشنز کپ،پاکستان انڈر21 کی بیلاروس کو شکست دے کر پہلی شاندار فتح
سیریز کا شیڈول اور میچز کے مقامات:
ٹور کے شیڈول کے مطابق واحد یوتھ ٹیسٹ میچ 2 سے 5 ستمبر تک ارونڈل کاسل کرکٹ گراؤنڈ میں کھیلا جائے گا، جس میں دونوں ٹیمیں چار روزہ فارمیٹ میں ایک دوسرے کے سامنے ہوں گی۔ ٹیسٹ میچ کے اختتام کے بعد دونوں ٹیموں کے مابین محدود اوورز کی جنگ شروع ہو گی۔
چار میچوں پر مشتمل یوتھ ون ڈے سیریز 9 سے 16 ستمبر تک جاری رہے گی۔ ون ڈے سیریز کا پہلا میچ ارونڈل، دوسرا میچ گلڈ فورڈ جبکہ آخری دو ون ڈے میچز ورمزلے کے تاریخی کرکٹ گراؤنڈ میں کھیلے جائیں گے، جہاں دونوں ٹیمیں سیریز کی ٹرافی حاصل کرنے کے لیے میدان میں اتریں گی۔
