کم عمری میں بالوں کا سفید ہونا ایک عام مسئلہ بنتا جا رہا ہے، تاہم طبی ماہرین کے مطابق اس کی کئی وجوہات ہوسکتی ہیں اور بعض عادات میں تبدیلی لاکر قبل از وقت بال سفید ہونے کے عمل کو کم کیا جاسکتا ہے۔
سگریٹ نوشی بھی اہم وجہ
اطالوی ڈرمیٹولوجی آن لائن جرنل میں شائع ہونے والی ایک تحقیق کے مطابق سگریٹ نوشی کرنے والے افراد میں 30 سال کی عمر سے پہلے بال سفید ہونے کا امکان سگریٹ نہ پینے والوں کے مقابلے میں تقریباً ڈھائی گنا زیادہ پایا گیا۔
ہیئر ڈائی اور شیمپو کا استعمال
بالوں کو رنگنے کے لیے استعمال ہونے والی بعض مصنوعات بھی قبل از وقت سفیدی کا باعث بن سکتی ہیں۔ ماہرین کے مطابق کچھ ہیئر ڈائیز، شیمپو اور دیگر مصنوعات میں ایسے کیمیکلز شامل ہوتے ہیں جو بالوں کی قدرتی رنگت برقرار رکھنے والے میلانین کو متاثر کرسکتے ہیں۔
مزید یہ بھی پڑھیں:سفید بال بڑھاپے کی علامت نہیں بلکہ جسم کے خلیوں کی خاموش چیخ جو مدد مانگ رہے ہیں
بالوں کے متعدد رنگوں میں موجود ہائیڈروجن پیرو آکسائیڈ بھی بالوں کی قدرتی رنگت پر اثر انداز ہوسکتا ہے، اس لیے ایسی مصنوعات کے غیر ضروری یا ضرورت سے زیادہ استعمال سے گریز بہتر ہے۔
ذہنی دباؤ کا اثر
بالوں کے جلد سفید ہونے کی ایک وجہ مسلسل ذہنی دباؤ بھی ہوسکتا ہے۔ نیچر میڈیسن میں شائع ہونے والی نیویارک یونیورسٹی کی تحقیق کے مطابق شدید یا مسلسل دباؤ جسم میں بالوں کی رنگت برقرار رکھنے والے خلیوں کو متاثر کرسکتا ہے۔
ماہرین کے مطابق ذہنی دباؤ کو کم کرنا مجموعی صحت کے ساتھ ساتھ بالوں کی صحت کے لیے بھی فائدہ مند ثابت ہوسکتا ہے۔
بعض طبی بیماریاں بھی وجہ بن سکتی ہیں
کچھ طبی مسائل، خصوصاً خودکار مدافعتی بیماریاں، بالوں کے وقت سے پہلے سفید ہونے کا سبب بن سکتی ہیں۔ 2008 میں شائع ہونے والی ایک تحقیق میں بالوں کی غیر معمولیات اور تھائیرائیڈ کی خرابی کے درمیان تعلق کی نشاندہی کی گئی تھی۔
اسی طرح ایلوپیشیا ایریٹا، جسے عام طور پر بالوں کا گول دائرے کی شکل میں جھڑنا بھی کہا جاتا ہے، بھی بعض افراد میں بالوں کی رنگت متاثر کرسکتا ہے۔
وٹامنز اور غذائی اجزاء کی کمی
جسم میں بعض وٹامنز اور غذائی اجزا کی کمی بھی قبل از وقت بال سفید ہونے سے منسلک ہوسکتی ہے۔ وٹامن بی 6، بی 12، بائیوٹن، وٹامن ڈی اور وٹامن ای کی کمی کو اس حوالے سے اہم سمجھا جاتا ہے۔
آئرن کی کمی بھی ایک عنصر
انٹرنیشنل جرنل آف ٹریچولوجی میں 2016 میں شائع ہونے والی ایک تحقیق کے مطابق 25 سال سے کم عمر افراد میں سیرم فیریٹین کی کم سطح بھی بالوں کے قبل از وقت سفید ہونے سے منسلک پائی گئی۔ فیریٹین جسم میں آئرن کے ذخیرے کی نشاندہی کرنے والا ایک اہم پیمانہ ہے۔
مزید یہ بھی پڑھیں:چین نے سفید بال سیاہ کرنے کا انقلابی طبّی طریقہ ایجاد کر لیا
ماہرین کے مطابق اگر کم عمری میں بال تیزی سے سفید ہورہے ہوں تو خود سے سپلیمنٹس لینے کے بجائے ڈاکٹر سے مشورہ کرکے ممکنہ غذائی کمی یا کسی طبی مسئلے کی جانچ کرانا بہتر ہے۔
