لاہور : اداکارہ میرا اور ان کی گھریلو ملازمہ کے درمیان مبینہ تلخ کلامی اور تشدد کی وائرل ویڈیو کا حقیقت پر مبنی پس منظر سامنے آ گیا ہے، جس پر لاہور پولیس نے اپنی انکوائری رپورٹ مکمل کرتے ہوئے معاملے کو باہمی رضامندی سے حل شدہ قرار دے دیا ہے۔
ڈی آئی جی آپریشنز کے ترجمان کے مطابق سوشل میڈیا پر وائرل ہونے والی ویڈیو حالیہ نہیں بلکہ جون 2026ء کی ہے، جو ڈیفنس بی پولیس اسٹیشن کی حدود میں پیش آنے والے واقعے سے متعلق ہے۔ وائرل ویڈیو میں اداکارہ میرا کو اپنی ملازمہ پر مبینہ طور پر ہاتھ اٹھاتے ہوئے دیکھا گیا تھا، جس کے بعد پولیس نے باضابطہ انکوائری کا آغاز کرتے ہوئے دونوں فریقین کو طلب کر کے ان کے بیانات قلمبند کیے۔
پولیس انکوائری کے دوران گھریلو ملازمہ نے اپنا بیان ریکارڈ کرواتے ہوئے تصدیق کی کہ ان کا اداکارہ میرا کے ساتھ تنازع باہمی رضامندی سے طے پا چکا ہے اور وہ اداکارہ کے خلاف کسی بھی قسم کی قانونی یا عدالتی کارروائی نہیں چاہتیں۔ ترجمان نے بتایا کہ ملازمہ کا تحریری معاہدہ اور وضاحتی ویڈیو بیان پولیس کے باقاعدہ ریکارڈ کا حصہ بنا لیا گیا ہے۔
یہ بھی پڑھیں: عائزہ خان اور دانش تیمور میں علیحدگی کی افواہیں: اداکارہ کا ردعمل آ گیا
دوسری جانب اداکارہ میرا کی جانب سے بھی ملازمہ پر گھر کا قیمتی سامان مبینہ طور پر لے جانے کا الزام عائد کرتے ہوئے پولیس کو درخواست دی گئی تھی۔ تاہم، انکوائری کے دوران ملازمہ کی جانب سے متعلقہ اشیاء واپس کیے جانے پر اداکارہ میرا نے بھی اپنی درخواست واپس لے لی۔
پولیس حکام نے حتمی انکوائری رپورٹ میں اس بات کی تصدیق کر دی ہے کہ دونوں فریقین کے درمیان تمام سوءِ تفاهمات اور تنازعات باہمی صلح اور تحریری معاہدے کے تحت مکمل طور پر ختم ہو چکے ہیں، جس کے بعد اس معاملے کو قانونی طور پر داخلِ دفتر کر دیا گیا ہے۔
