پاکستان میں الیکٹرک موٹر سائیکل کی قیمتوں میں اضافہ کر دیا گیا ہے ۔
مارکیٹ ذرائع کے مطابق الیکٹرک موٹرسائیکلوں کی قیمتیں تقریباً 5 ہزار روپے تک بڑھ گئی ہیں اور اب یہ 1,25,000 روپے سے لے کر 3,50,000 روپے تک دستیاب ہیں ۔ یہ قیمتیں بائیک کی بیٹری کی رینج اور موٹر کی قسم کے مطابق مختلف ہیں ۔
قیمتوں میں اضافے کی سب سے بڑی وجہ بڑھتی ہوئی توانائی کی قیمتیں ہیں، خاص طور پر پیٹرول کے نرخوں میں اضافہ اور مشرق وسطیٰ میں جاری تنازعات کے سبب ممکنہ سپلائی خلل ہے ۔
اسمبلرز کا کہنا ہے کہ سمندری فریٹ چارجز، لاجسٹکس کے اخراجات اور ڈیزل پر چلنے والی ترسیل کی بڑھتی لاگت نے انہیں قیمتیں بڑھانے پر مجبور کیا ہے ۔
ایک اسمبلر کے مطابق سامان فراہم کرنے والوں نے اپنے کرایوں میں 30 فیصد اضافہ کیا ہے، جبکہ ٹرانسپورٹرز آف گڈز ایسوسی ایشن نے ڈیزل کی قیمتوں میں اضافے کی وجہ سے کرایوں میں 60 فیصد اضافہ کا اعلان کیا ہے ۔
مزید یہ بھی پڑھیں:ہونڈا کی پہلی جدید الیکٹرک موٹرسائیکل لانچ ،قیمت بھی سامنے آگئی
مارکیٹ میں الیکٹرک بائیکس کی بڑھتی ہوئی طلب بھی قیمتوں میں اضافے کا اہم عنصر ہے ۔ اسمبلر کے مطابق صرف مارچ کے مہینے میں انہوں نے 7,000 سے زائد یونٹس فروخت کیے ۔
اس سے اندازہ لگایا جا سکتا ہے کہ صارفین میں الیکٹرک بائیکس کی مقبولیت میں اضافہ ہو رہا ہے ۔
پیٹرول بائیکس کی فروخت بھی مضبوط ہے، لیکن مستقبل کے رجحانات کا تعین پاکستان آٹو موٹیو مینوفیکچررز ایسوسی ایشن کے مارچ کے اعداد و شمار سے واضح ہوگا ۔
نئی قیمتیں کچھ کمپنیوں کے لیے 3 اپریل سے اور دیگر کے لیے 10 اپریل سے نافذ العمل ہوں گی ۔
مزید یہ بھی پڑھیں:ہونڈا کی نئی 150 سی سی موٹرسائیکل اور الیکٹرک سکوٹر متعارف
ماہرین کا کہنا ہے کہ اگرچہ الیکٹرک موٹر سائیکلوں کی قیمتیں بڑھ گئی ہیں لیکن بڑھتی توانائی کی قیمتوں اور لاگت کے دباؤ کے پیش نظر، یہ قیمتیں مارکیٹ کے موجودہ حالات کے مطابق مناسب ہیں اور مستقبل میں مزید تبدیلیاں متوقع ہیں ۔
