مشرق وسطیٰ میں ایران، امریکہ اور اسرائیل کے درمیان لڑائی بہت خطرناک ہو گئی ہے۔ ایران نے اسرائیل سمیت کئی خلیجی ممالک میں جوابی کارروائیاں شروع کر دی ہیں جس سے جانی اور مالی نقصان ہوا ہے۔
تل ابیب اور یروشلم دھماکوں سے گونج اٹھے اور سائرن بجنے کے بعد لوگ بنکروں میں چلے گئے۔ اسرائیلی میڈیا کا کہنا ہے کہ مغربی یروشلم میں ہونے والے حملے میں 9 اسرائیلی ہلاک اور بہت سے زخمی ہوئے ہیں۔ مقبوضہ بیت المقدس میں میزائل گرنے سے آگ لگ گئی اور ہر طرف خوف پھیل گیا۔
یہ بھی پڑھیں: سعودی ریفائنری پر ڈرون حملہ؛ راس تنورا میں ہنگامی حالت نافذ، خطے میں کشیدگی بڑھ گئی
خلیجی ممالک میں بھی صورتحال بہت خراب ہے۔ سعودی عرب کے شہر راس تنورہ میں آرامکو آئل ریفائنری پر ڈرون حملہ ہوا جس سے وہاں آگ لگ گئی۔ کویت میں امریکی سفارت خانے کے پاس دھواں اٹھتا دیکھا گیا اور وہاں فائر فائٹرز پہنچ گئے۔ سفارت خانے نے اپنے شہریوں کو گھروں کی نچلی منزل پر رہنے اور کھڑکیوں سے دور رہنے کی ہدایت کی ہے۔ بحرین، قطر اور متحدہ عرب امارات کے دارالحکومتوں میں بھی زوردار دھماکے سنے گئے ہیں۔ منامہ میں سائرن بجنے کے بعد ایک اہم پل کو بند کر دیا گیا ہے۔ قبرص میں برطانوی فوجی اڈے پر بھی ڈرون حملہ ہوا ہے۔
دوسری طرف ایران پر امریکہ اور اسرائیل کے حملوں میں 35 افراد جاں بحق ہو گئے ہیں جن میں ایک چینی شہری بھی شامل ہے۔ لبنان پر اسرائیلی بمباری سے 31 افراد جان سے گئے اور 149 زخمی ہوئے ہیں۔ اس جنگ کی وجہ سے پوری دنیا کا فضائی نظام متاثر ہوا ہے۔ اب تک 1239 پروازیں منسوخ ہو چکی ہیں اور ہزاروں مسافر ایئرپورٹس پر پھنسے ہوئے ہیں۔ پاکستان میں بھی گزشتہ تین دنوں میں 500 سے زیادہ پروازیں منسوخ ہوئی ہیں۔
