کولمبو: آئی سی سی ہال آف فیم میں شامل آسٹریلیا کے سابق کپتان رکی پونٹنگ اور بھارت کے معروف کمنٹیٹر روی شاستری نے پاکستان کے اسٹار بیٹر بابر اعظم کی حالیہ غیر مستقل کارکردگی پر گہرے تحفظات کا اظہار کرتے ہوئے انہیں اہم مشورے دے دیے ہیں۔
نیدرلینڈز کے خلاف کارکردگی اور ماہرین کی رائے:
ٹی ٹوئنٹی ورلڈ کپ 2026 کے افتتاحی میچ میں نیدرلینڈز کے خلاف بابر اعظم کی جانب سے 18 گیندوں پر صرف 15 رنز کی اننگز نے کرکٹ ماہرین کو تشویش میں مبتلا کر دیا ہے۔ آئی سی سی ریویو پروگرام میں گفتگو کرتے ہوئے رکی پونٹنگ کا کہنا تھا کہ جب کوئی بیٹر اتنی زیادہ گیندیں کھیل کر کم رنز بناتا ہے تو وہ نہ صرف خود بلکہ دوسرے اینڈ پر موجود کھلاڑی پر بھی دباؤ بڑھا دیتا ہے۔ انہوں نے مشورہ دیا کہ بابر کو اننگز کے آغاز میں ہی باؤنڈریز لگانا ہوں گی، ورنہ ٹیم کا مومینٹم برقرار رکھنا مشکل ہو جائے گا۔
یہ بھی پڑھیں: آئی سی سی وفد کی لاہور آمد، پاکستان نے میچ کھیلنے کے لیے کڑی شرائط سامنے رکھ دیں
روی شاستری نے بھی ان خیالات کی تائید کرتے ہوئے کہا کہ کیریئر کے اس مرحلے پر توقعات کا بوجھ بابر کو متاثر کر رہا ہے۔ ان کے مطابق بابر کو اب جارحانہ انداز اپنانا ہوگا، چاہے اس میں آؤٹ ہونے کا خطرہ ہی کیوں نہ ہو۔ شاستری نے خبردار کیا کہ ٹی ٹوئنٹی کے مڈل اوورز میں وقت ضائع کرنے کی گنجائش نہیں ہوتی اور اگر بابر نے خود کو جلد ایڈجسٹ نہ کیا تو ان پر سوالات مزید بڑھیں گے۔
بیٹنگ پوزیشن اور ٹیم میں جگہ پر سوالات:
رکی پونٹنگ نے بابر اعظم کو نمبر چار پر بیٹنگ کرانے کے فیصلے کو بھی تنقید کا نشانہ بنایا اور کہا کہ اس سے کھلاڑی پر دباؤ بڑھا ہے۔ انہوں نے مشورہ دیا کہ بابر کو دوبارہ نمبر تین پر لایا جائے تاکہ وہ پاور پلے کی پابندیوں کا فائدہ اٹھا سکیں۔ پونٹنگ نے ایک بڑا سوال اٹھاتے ہوئے کہا کہ اگر بابر کی پاور ہٹنگ میں کمی آئی ہے تو ٹیم کو یہ فیصلہ کرنا ہوگا کہ آیا انہیں پلیئنگ الیون میں برقرار رکھا جائے یا نہیں، کیونکہ ٹورنامنٹ میں آگے بڑھنے کے لیے پاکستان کو بابر اعظم کے بہترین ورژن کی ضرورت ہے۔
مزید پڑھیں: بابر اعظم کو کبھی بھی چوتھے نمبر پر نہیں کھلانا چاہیے : باسط علی
پاکستان کے اگلے مقابلے اور پاک بھارت میچ پر غیریقینی:
پاکستان اپنا اگلا میچ 10 فروری کو کولمبو میں امریکا کے خلاف کھیلے گا، جبکہ گروپ اسٹیج کا آخری میچ 18 فروری کو نمیبیا کے خلاف شیڈول ہے۔ دوسری جانب، آئی سی سی کے ڈپٹی چیئرمین عمران خواجہ، پی سی بی چیئرمین محسن نقوی اور بی سی بی صدر امین الاسلام کے درمیان ہونے والی ملاقات کے باوجود 15 فروری کو شیڈول پاک بھارت ٹاکرے پر تاحال سوالیہ نشان برقرار ہے۔
