واٹس ایپ، جو دنیا بھر میں سب سے زیادہ استعمال ہونے والی میسجنگ ایپ ہے اور روزانہ اربوں صارفین رابطے کے لیے استعمال کرتے ہیں، نے اپنے آئی او ایس بیٹا ورژن میں ایک نیا فیچر متعارف کرانے کی تیاری کرلی ہے جس کا صارفین کافی عرصے سے انتظار کر رہے تھے۔
نئے فیچر کی بدولت گروپ چیٹس کو فالو کرنا اور سمجھنا پہلے سے کہیں زیادہ آسان ہوجائے گا، خاص طور پر ان صارفین کے لیے جو کسی گروپ میں نئے شامل ہوتے ہیں۔ اس فیچر کے تحت گروپ میں شامل ہونے والے نئے ممبرز پچھلے 14 دنوں کی چیٹ ہسٹری دیکھ سکیں گے، جس سے وہ گفتگو کے پس منظر اور موضوعات کو بہتر طریقے سے سمجھ سکیں گے۔
یہ سہولت گروپ ایڈمن کے لیے بھی آسانی پیدا کرے گی، کیونکہ انہیں پرانے پیغامات الگ سے بھیجنے کی ضرورت نہیں ہوگی۔ نئے فیچر کے تحت ایک وقت میں زیادہ سے زیادہ 100 پیغامات کی ہسٹری شیئر کی جاسکے گی، جو چیٹ میں الگ رنگ میں نظر آئیں گے تاکہ واضح رہے کہ یہ پرانے پیغامات ہیں۔
یہ بھی پڑھیں: واٹس ایپ اکاؤنٹس ہائی جیکنگ: مہم صارفین احتیاطی تدابیر اپنانے کی ہدایت
دلچسپ بات یہ ہے کہ جب پرانی چیٹ ہسٹری نئے ممبرز کے ساتھ شیئر کی جائے گی تو گروپ کے دیگر ممبرز کو بھی نوٹیفکیشن کے ذریعے آگاہ کیا جائے گا، جس میں یہ واضح کیا جائے گا کہ کس ممبر نے یہ پیغامات شیئر کیے ہیں۔ یہ تبدیلی گروپ میں شفافیت بڑھانے اور نئے ممبرز کو گروپ کے حالیہ حالات سے ہم آہنگ کرنے میں اہم کردار ادا کرے گی۔
واٹس ایپ کے اس فیچر سے صارفین کی گروپ چیٹس کا تجربہ مزید مربوط اور آسان ہوگا، خاص طور پر ان لوگوں کے لیے جو نئے گروپس میں شامل ہوتے ہیں اور فوری طور پر پچھلی گفتگو کو سمجھنا چاہتے ہیں۔ یہ اقدام واٹس ایپ کے صارف دوست ماحول کو مزید بہتر بنانے اور رابطے کو آسان بنانے کی جانب ایک اہم قدم ہے۔
