اکثر گھروں میں سست انٹرنیٹ اسپیڈ یا بار بار کنکشن منقطع ہونے کی شکایت سامنے آتی ہے۔ بظاہر یہ مسئلہ مہنگی انٹرنیٹ سروس یا کمزور راؤٹر سے جڑا محسوس ہوتا ہے، مگر حقیقت میں اس کی ایک عام اور نظر انداز کی جانے والی وجہ راؤٹر کی غلط جگہ پر تنصیب بھی ہو سکتی ہے۔
یہ ایک عام تاثر ہے کہ بہترین وائی فائی راؤٹر یا مہنگا انٹرنیٹ پیکج سست رفتار یا کنکشن منقطع ہونے جیسے مسائل سے مکمل تحفظ فراہم کرتا ہے، لیکن عملی طور پر ایسا ہمیشہ نہیں ہوتا۔ دراصل وائی فائی راؤٹر کو گھر میں کس مقام پر رکھا گیا ہے، یہی انٹرنیٹ اسپیڈ اور کنکشن کے استحکام میں بنیادی کردار ادا کرتا ہے۔
وائی فائی سگنلز آنکھوں سے دکھائی نہیں دیتے، اس لیے یہ اندازہ لگانا بھی مشکل ہوتا ہے کہ یہ سگنلز کس طرح دیواروں، فرش، سطحوں یا دیگر برقی آلات سے ٹکرا کر کمزور ہو جاتے ہیں۔ رکاوٹیں، زیادہ فاصلہ اور برقی مداخلت راؤٹر کے سگنلز کو کمزور یا ناقابلِ اعتماد بنا دیتی ہیں، جس کا نتیجہ سست انٹرنیٹ یا اچانک کنکشن ختم ہونے کی صورت میں نکلتا ہے۔
یہ بھی پڑھیں: پاکستانی طالب علم نےپاکستان کااپنا اردو چیٹ جی پی ٹی “قلب” متعارف کرا دیا
یہ مسئلہ اس وقت زیادہ نمایاں ہو جاتا ہے جب راؤٹر ایسی جگہ نصب کیا جائے جو وائی فائی سگنلز کے لیے موزوں نہ ہو۔ تاہم چند بنیادی نکات کو مدنظر رکھ کر اس صورتحال سے آسانی سے بچا جا سکتا ہے اور وائی فائی سگنلز کو بہتر بنایا جا سکتا ہے۔
رکاوٹوں اور مداخلت سے بچاؤ:
متعدد اشیاء وائی فائی راؤٹر کے افعال کو متاثر کرتی ہیں، لیکن سب سے اہم اصول یہ ہے کہ راؤٹر کو ایسی جگہوں پر لگانے سے گریز کیا جائے جو سگنلز کو کمزور کرتی ہوں۔ عام طور پر لوگ راؤٹر کو ٹی وی کے بالکل پیچھے یا قریب رکھ دیتے ہیں، حالانکہ ٹی وی کی دھاتی پلیٹیں اور اندرونی پرزہ جات وائی فائی سگنلز میں مداخلت کا باعث بنتے ہیں۔
اسی طرح راؤٹر کو بند جگہوں جیسے الماریوں یا کتابوں کی الماریوں میں رکھنا بھی نقصان دہ ثابت ہوتا ہے، کیونکہ ایسی رکاوٹوں کے باعث سگنلز کو گزرنے میں مشکلات پیش آتی ہیں۔ فاصلہ بھی ایک اہم عنصر ہے، خاص طور پر اس صورت میں جب راؤٹر کسی دوسری منزل پر نصب ہو۔
وائی فائی سگنلز کو فرش، قالین اور پلمبنگ انفراسٹرکچر سے گزرنے میں بھی دقت پیش آتی ہے۔ اس کے علاوہ گھر میں موجود دیگر 2.4 گیگا ہرٹز اور 5 گیگا ہرٹز ڈیوائسز بھی سگنلز پر اثرانداز ہوتی ہیں، جبکہ ایک سے زیادہ راؤٹرز کی موجودگی ایک دوسرے کے افعال میں مداخلت کا سبب بن سکتی ہے۔
یہ بھی پڑھیں: ایران میں اسٹار لنک کے ذریعے مفت انٹرنیٹ فراہم کر دیا گیا
راؤٹر کے لیے بہتر مقام کون سا ہے؟
ماہرین کے مطابق وائی فائی راؤٹر کو گھر کے کسی کھلے حصے یا کمرے میں قدرے اونچائی پر نصب کرنا بہتر ہوتا ہے۔ گھر کا وسطی مقام اس حوالے سے سب سے موزوں سمجھا جاتا ہے، کیونکہ راؤٹر ہر سمت سگنلز بھیجتا ہے۔ اگر راؤٹر کو کھڑکی یا داخلی دروازے کے قریب نصب کیا جائے تو زیادہ تر سگنلز گھر سے باہر منتقل ہو جاتے ہیں۔
اگر راؤٹر کے اینٹینا ایڈجسٹ کیے جا سکتے ہوں تو انہیں مختلف سمتوں میں موڑنا بھی فائدہ مند ثابت ہو سکتا ہے، جس سے سگنلز کی تقسیم بہتر ہو جاتی ہے۔
