مظفر آباد: وزارت حج پاکستان نے آزاد کشمیر سے اس سال حج پر جانے والے عازمین کے لیے تربیتی نشستیں منعقد کیں۔ اس سال تیس ہزار سے زائد پاکستانی فریضہ حج ادا کریں گے۔
مظفر آباد ڈویژن سے حج پر جانے والے خوش نصیبوں کے لیے تربیتی پروگرام بوائز ڈگری کالج عید گاہ آڈیٹوریم میں منعقد ہوا۔ وزارت مذہبی امور پاکستان نے ملک بھر کے عازمین حج کے لیے تربیتی نشستوں کا اہتمام کیا، جس میں آزاد کشمیر میں بھی خصوصی کیمپ لگائے گئے۔
تفصیلات کے مطابق، کوٹلی میں 2 جنوری اور میرپور میں 4 جنوری کو تربیتی پروگرامز منعقد ہوئے، جبکہ راولاکوٹ میں 5 جنوری کو بھی کیمپ کا انعقاد کیا گیا۔ وزارت حج نے تمام عازمین پر زور دیا ہے کہ وہ اپنے شیڈول کے مطابق تربیتی نشستوں میں لازمی شرکت کریں تاکہ حج کے صحیح طریقے اور احکامات سے مکمل آگاہی حاصل ہو سکے۔
یہ بھی پڑھیں: حج 2026 کے لیے سخت طبی ضوابط نافذ کر دیے گئے
حج 2026 کے لیے لازمی تربیتی پروگرام کا آغاز یکم جنوری 2026 کو اسلام آباد سے ہوا، اور آزاد کشمیر میں یہ نشستیں عازمین کو حج کے احکامات، مناسک اور ضروری معلومات فراہم کرنے کے لیے رکھی گئی ہیں۔ جو افراد اپنے مقررہ شیڈول میں شامل نہیں ہو سکے، وہ متبادل تاریخوں پر حاضری یقینی بنا سکتے ہیں۔
عازمین اپنے تربیتی شیڈول کی معلومات پاک حج 2026 موبائل ایپ اور وزارت مذہبی امور کی ویب سائٹ پر بھی حاصل کر سکتے ہیں۔ وزارت حج نے واضح کیا ہے کہ تربیتی نشستیں حج کے احکامات اور طریقہ کار سے آگاہی کے لیے انتہائی اہمیت رکھتی ہیں، اور ہر عازم کے لیے شرکت لازمی ہے۔
