اسلام آباد: وفاقی وزیر صحت سید مصطفیٰ کمال نے وزیر صحت آزاد جموں و کشمیر سید باذل نقوی اور سیکرٹری ہیلتھ AJK کے ساتھ ایک اہم ملاقات کی، جس میں اسپیشل سیکرٹری، ایڈیشنل سیکرٹری، جوائنٹ سیکرٹری (ایڈمن) اور ڈی جی ہیلتھ بھی شریک تھے۔
ملاقات کا محور PSDP منصوبوں، نرسنگ کے شعبے کی بہتری، اور فنڈنگ کے مسائل تھے۔ اس موقع پر دونوں وزراء نے آزاد کشمیر اور وفاق کے درمیان صحت کے شعبے میں تعاون کو مزید مضبوط بنانے پر تفصیلی تبادلہ خیال کیا۔ اجلاس میں یہ بھی زیر غور آیا کہ صحت کے ترقیاتی منصوبوں کو مؤثر انداز میں آگے بڑھانے کے لیے کس طرح وسائل اور معاونت کو بہترین طریقے سے بروئے کار لایا جا سکتا ہے۔
وفاقی وزیر صحت سید مصطفیٰ کمال نے اس موقع پر یقین دہانی کرائی کہ آزاد کشمیر میں جاری ترقیاتی منصوبوں کے لیے وفاق ہر ممکن مدد فراہم کرے گا تاکہ وہاں کے عوام کو معیاری اور بہتر صحت کی سہولیات فراہم کی جا سکیں۔ وزراء نے اس بات پر بھی اتفاق کیا کہ دونوں طرف سے مربوط اقدامات اور تعاون کے ذریعے صحت کے شعبے میں معیار اور خدمات کو بہتر بنایا جائے گا۔
یہ بھی پڑھیں: آزادکشمیر ،ایکسپائر دہی تاریخ ٹیمپرڈ کرکے فروخت کرنے کی کوشش ناکام
اس ملاقات میں شریک افسران نے بھی منصوبوں کی موجودہ صورتحال اور مستقبل کے لائحہ عمل پر تفصیلی معلومات فراہم کیں، جس سے دونوں وزراء کو آزاد کشمیر میں صحت کے شعبے میں مزید ترقیاتی اقدامات کے لیے جامع منصوبہ بندی کا موقع ملا۔
یہ بھی پڑھیں:فوڈ اتھارٹی مظفرآباد ان ایکشن، 15 لیٹر مضر صحت دودھ تلف
یہ ملاقات صحت کے شعبے میں وفاق اور آزاد کشمیر کے درمیان تعاون کو مزید مضبوط کرنے اور عوامی سہولیات کو بہتر بنانے کے لیے ایک اہم قدم تصور کی جا رہی ہے۔
