سڈنی: آسٹریلیا کے شہر سڈنی کے ساحلی علاقے میں پیش آنے والے فائرنگ کے واقعے کو باقاعدہ طور پر دہشتگردی قرار دے دیا گیا ہے، جبکہ تحقیقات کے بعد یہ انکشاف سامنے آیا ہے کہ حملے میں ملوث دونوں افراد آپس میں باپ بیٹا تھے۔ نیو ساؤتھ ویلز پولیس نے واقعے سے متعلق تفصیلات جاری کرتے ہوئے مزید ملزمان کی تلاش ختم کرنے کا اعلان بھی کر دیا ہے۔
نیو ساؤتھ ویلز پولیس کی جانب سے کی گئی پریس کانفرنس میں بتایا گیا کہ ساحل پر یہودیوں کی ایک تقریب کے دوران فائرنگ کرنے والے دونوں حملہ آور باپ بیٹا تھے۔ پولیس کے مطابق حملے میں ملوث ایک حملہ آور ہلاک ہو گیا جبکہ دوسرا حملہ آور شدید زخمی حالت میں حراست میں ہے۔
پولیس کمشنر نے پریس کانفرنس کے دوران بتایا کہ ہلاک ہونے والے حملہ آور کی شناخت 50 سالہ ساجد اکرم کے نام سے ہوئی ہے، جبکہ زخمی حملہ آور کی شناخت 24 سالہ نوید اکرام کے طور پر کی گئی ہے۔ پولیس حکام کے مطابق دونوں افراد کافی عرصے سے آسٹریلیا میں مقیم تھے، تاہم ان کے پس منظر سے متعلق مزید تفصیلات فی الحال فراہم نہیں کی جا سکتیں۔
پولیس نے بتایا کہ ہلاک حملہ آور کے پاس گزشتہ 10 برس سے اسلحے کا باقاعدہ لائسنس موجود تھا اور وہ ایک گن کلب کا رکن بھی تھا۔ واقعے کے بعد ہلاک حملہ آور کے قبضے سے مجموعی طور پر 6 ہتھیار برآمد کیے گئے ہیں، تاہم پولیس کا کہنا ہے کہ ان تمام ہتھیاروں کے فائرنگ کے واقعے میں استعمال ہونے یا نہ ہونے سے متعلق تحقیقات جاری ہیں۔
یہ بھی پڑھیں: سڈنی واقعہ ، ہلاکتیں16 ہو گئیں،آسٹریلوی وزیراعظم کا سخت اقدامات کا اعلان
پولیس حکام کے مطابق جائے وقوعہ کے قریب سے دو فعال دیسی ساختہ دھماکہ خیز مواد بھی برآمد ہوئے، جنہیں فوری طور پر محفوظ بنا لیا گیا۔ پولیس نے واضح کیا کہ مزید کسی حملہ آور یا سہولت کار کی تلاش اب نہیں کی جا رہی، تاہم دہشتگردی کے اس حملے کے پیچھے موجود محرکات اور وجوہات جاننے کے لیے تحقیقات جاری رہیں گی۔
یاد رہے کہ سڈنی کے ساحلی علاقے میں ہونے والی اس فائرنگ کے نتیجے میں 16 افراد ہلاک جبکہ 40 زخمی ہوئے تھے۔ پولیس کی جوابی کارروائی میں ایک حملہ آور موقع پر مارا گیا جبکہ دوسرے کو زخمی حالت میں گرفتار کر لیا گیا۔
یہ بھی پڑھیں:سڈنی حملہ خوفناک، حملہ آور کو روکنے والا شخص بہادر ہے، ڈونلڈ ٹرمپ
دوسری جانب آسٹریلوی حکومت نے اس افسوسناک واقعے پر آج یومِ سوگ کا اعلان کیا ہے، جس کے تحت سرکاری عمارتوں پر قومی پرچم سرنگوں رکھا جائے گا۔
