راولپنڈی: چیف آف ڈیفنس فورسز جنرل عاصم منیر نے واضح کیا ہے کہ بھارت کسی خود فریبی یا گمان میں نہ رہے، کیونکہ اگلی بار پاکستان کا جواب پہلے سے زیادہ تیز اور شدید ہوگا۔
تینوں مسلح افواج کے افسران سے خطاب میں جنرل عاصم منیر نے بتایا کہ نئے قائم ہونے والے ڈیفنس فورسز ہیڈ کوارٹرز میں بنیادی تبدیلی تاریخی اہمیت رکھتی ہے۔ انہوں نے کہا کہ بڑھتے اور بدلتے ہوئے خطرات کے پیشِ نظر ضروری ہے کہ ملٹی ڈومین آپریشنز کو تینوں افواج کے متحدہ نظام کے تحت مزید مضبوط اور مربوط بنایا جائے۔
فیلڈ مارشل نے مزید کہا کہ ڈیفنس فورسز ہیڈ کوارٹرز کا قیام اس تبدیلی کی جانب ایک لازمی قدم ہے۔ ہر سروس اپنی آپریشنل تیاریوں میں اپنی انفرادیت برقرار رکھے گی، جبکہ ہیڈکوارٹر سروسز کے کام کو مربوط اور ہم آہنگ کرے گا۔
یہ بھی پڑھیں: آرمی چیف، چیف آف ڈیفنس فورسز، فیلڈ مارشل عاصم منیر کے اعزاز میں گارڈ آف آنر پیش
کمانڈ کی یکجہتی اور داخلی خود مختاری:
جنرل عاصم منیر نے کہا کہ کمانڈ کی یکجہتی کے ساتھ ساتھ تینوں افواج اپنی داخلی خودمختاری اور تنظیمی ڈھانچہ برقرار رکھیں گی۔ انہوں نے واضح کیا کہ طالبان رجیم کو بھی پیغام دیا گیا ہے کہ ان کے پاس فتنہ الخوارج یا پاکستان میں سے کسی ایک کا انتخاب کرنے کے علاوہ کوئی راستہ نہیں۔
پاکستان کی خودمختاری اور ناقابل تسخیر تصور:
فیلڈ مارشل نے کہا کہ پاکستان ایک امن پسند ملک ہے، تاہم کسی کو بھی پاکستان کی خودمختاری یا علاقائی سالمیت کو خطرے میں ڈالنے اور ہمارے عزم کو آزمانے کی اجازت نہیں دی جائے گی۔
انہوں نے مزید کہا کہ تمام یہ جان لیں کہ پاکستان کا تصور ناقابل تسخیر ہے اور اس کی حفاظت ایمان سے سرشار بہادر فوجیوں اور متحد قوم کے پختہ عزم نے کر رکھی ہے۔ فیلڈ مارشل نے کہا، “پاکستان ہمیشہ زندہ باد۔”
