لاہور/پشاور: فضائی آلودگی کے باعث پیدا ہونے والی شدید دھند کے پیشِ نظر موٹروے حکام نے لاہور، سیالکوٹ موٹر وے ایم 11 اور پشاور موٹر وے ایم 1 کو رشکئی تک ہر قسم کی ٹریفک کے لیے بند کر دیا ہے۔ موٹر وے پولیس کے ترجمان نے کہا کہ یہ فیصلہ عوام کی جان و مال کے تحفظ کے لیے کیا گیا تاکہ ممکنہ حادثات سے بروقت بچا جا سکے۔
ترجمان نے واضح کیا کہ ’دھند میں حدِ نگاہ انتہائی کم ہونے کی وجہ سے ڈرائیونگ نہایت خطرناک ہو جاتی ہے، اس لیے موٹروے کی بندش ضروری تھی۔‘ شہریوں کو ہدایت کی گئی ہے کہ وہ غیر ضروری سفر سے گریز کریں اور اگر سفر ناگزیر ہو تو گاڑیوں کی فوگ لائٹس کا استعمال یقینی بنائیں۔
محکمہ ماحولیات پنجاب کی ویب سائٹ کے مطابق صوبے کے مختلف شہروں میں فضائی آلودگی کی صورتحال تشویشناک ہے۔ گوجرانوالہ میں فضائی آلودگی کی سطح 349، رحیم یار خان میں 321 جبکہ ملتان میں 315 پارٹیکولیٹ میٹر ریکارڈ کیے گئے ہیں۔ ماہرین کے مطابق یہ زیادہ مقدار نہ صرف دھند میں اضافے کا سبب بنتی ہے بلکہ شہریوں کی صحت کے لیے بھی نقصان دہ ہے۔
یہ بھی پڑھیں: آزاد کشمیر میں طویل خشک موسم: دھند، گرد و غبار کا راج
موٹر وے پولیس نے شہریوں کو خبردار کیا کہ دھند میں لین کی خلاف ورزی مہلک حادثات کا سبب بن سکتی ہے، اس لیے لین ڈسپلن پر سختی سے عمل کریں۔ ترجمان نے مزید کہا کہ موٹروے کے تمام سیکشنز پر صورتحال کا مسلسل جائزہ لیا جا رہا ہے اور جیسے ہی موسم بہتر ہوگا، ٹریفک بحال کر دی جائے گی۔ شہریوں سے اپیل کی گئی ہے کہ وہ سفر سے پہلے موٹروے ہیلپ لائن 130 یا متعلقہ ایپ پر تازہ ترین معلومات حاصل کریں۔
