استنبول: (کشمیر ڈیجیٹل) برادر اسلامی ملک ترکیہ نے پاکستان میں جنگی ڈرونز تیار کرنے کی فیکٹری بنانے کیلئے تیاریاں مکمل کر لی ہیں۔ پاکستان اور ترکیہ کے درمیان دفاعی تعاون کے سلسلے میں یہ نیا قدم دونوں ممالک کے تعلقات میں مزید اضافہ ظاہر کرتا ہے۔ ترک حکام کے مطابق جنگی ڈرونز کی تیاری کے لیے فیکٹری کے قیام سے متعلق تیاریوں کو حتمی شکل دے دی گئی ہے، جس کے بعد پاکستان میں جدید ٹیکنالوجی سے لیس پلیٹ فارم کی تیاری ممکن ہو سکے گی۔
بلومبرگ کی رپورٹ کے مطابق ترکیہ پاکستان کو اپنے ففتھ جنریشن لڑاکا طیاروں کے پروگرام میں بھی شامل کرنا چاہتا ہے۔ رپورٹ میں کہا گیا ہے کہ اس منصوبے کے تحت سٹیلتھ ٹیکنالوجی رکھنے والے اور طویل فاصلے تک پرواز کرنے والے ڈرونز کے پرزے پاکستان برآمد کیے جائیں گے، جہاں انہیں جوڑا جائے گا۔ اس عمل کے ذریعے نہ صرف مقامی سطح پر اسمبلنگ ممکن ہو گی بلکہ دیے گئے منصوبے کے مطابق پاکستان میں انہی پرزوں کو یکجا کر کے مکمل نظام کی صورت دی جائے گی۔
یہ بھی پڑھیں: ترکیہ کے بغیر پائلٹ لڑاکا طیارے کزل ایلما نے نئی تاریخ رقم کردی
رپورٹ میں یہ بھی بتایا گیا ہے کہ ترکیہ مشترکہ پیداواری معاہدے کے تحت پاکستانی بحریہ کیلئے جنگی جہازوں کی تیاری پر بھی کام کر رہا ہے۔ اس تعاون کے تحت جنگی جہازوں کی پیداوار پر پیش رفت جاری ہے، جو پاکستان اور ترکیہ کے درمیان دفاعی اشتراک کی ایک توسیع ہے۔ اس کے ساتھ ساتھ رپورٹ میں یہ نکتہ بھی شامل ہے کہ ترکیہ نے پاکستان کے درجنوں ایف 16 طیاروں کو بھی اپ گریڈ کیا ہے۔
