کولمبو:انٹرنیشنل کرکٹ کونسل (آئی سی سی) ویمنز کرکٹ ورلڈ کپ 2025 کے چھٹے میچ میں بھارت نے پاکستان کو 88 رنز کے بھاری مارجن سے شکست دے دی ۔
بھارت کی طرف سے ملنے والے 248 رنز کے ہدف کے تعاقب میں پوری قومی ٹیم 43 اوورز میں 159 رنز پرآل آؤٹ ہوگئی ، سدرہ امین 81 رنز بناکر نمایاں بیٹر رہیں ، نتالیہ پرویز 33، سدرہ نواز نے 14 رنزجوڑے جبکہ دیگر کھلاڑیوں میں کوئی بھی ڈبل فگر میں بھی داخل نہ ہوسکی ۔
کولمبو کے پریما داسا اسٹیڈیم میں کھیلے گئے میچ میں پاکستان ویمن ٹیم کی کپتان فاطمہ ثنا نے ٹاس جیت کر بھارت کو بیٹنگ کی دعوت دی ، بھارتی ویمنز ٹیم نے پہلے بلے بازی کرتے ہوئے مقررہ 50 اوورز میں 247 رنز بنائے اورپوری ٹیم ڈھیر ہوگئی ۔
مزید یہ بھی پڑھیں:ثنا جاوید سے علیحدگی کی خبروں پر شعیب ملک نے خاموشی توڑ دی
بھارتی ٹیم کی جانب سے اننگز کا آغاز کرنے والی پراتیکا راول اور سمرتی مندھانا نے بالترتیب 31 اور 23 رنز بنائے جبکہ ہرلین دیول نے 46 رنز کی عمدہ اننگز کھیلی ۔
کپتان ہرمن پریت کور 19، جمیما روڈریگز 32، دیپتی شرما 25، سنہ رانا 20 اور وکٹ کیپربیٹر رچا گھوش نے 35 رنز کی جارحانہ اننگز کھیلی ۔
قومی ویمنز ٹیم کی جانب سے ڈیانا بیگ نے 4 کھلاڑیوں کو پویلین کی راہ دکھائی جبکہ سعدیہ اقبال ، فاطمہ ثنا نے 2،2 اور رامین شمیم، نشرا سندھوکے حصے میں ایک ، ایک وکٹ آئی ۔
قبل ازیں ویمنز ورلڈ کپ میں بھی بھارت نے اپنی ہٹ دھرمی برقرار رکھتے ہوئے کھیل کی روح کے منافی اقدامات جاری رکھے ، ٹاس کے دوران بھارتی ٹیم کی کپتان ہرمن پریت کور نے پاکستانی کپتان فاطمہ ثناء سے ہاتھ نہیں ملایا ۔
مزید یہ بھی پڑھیں:وکٹیں نہ ملنے پر کپتان ویمن قومی ٹیم فاطمہ ثناکو والدہ نے کیا مشورہ دیا؟
