بھارت کے زیر قبضہ لداخ میں احتجاجی مظاہروں کے بعد صورتحال کشیدہ ہونے پر کرفیو نافذ کردیا گیا ہے۔
مقبوضہ علاقے میں ریاستی حیثیت کی بحالی کے مطالبے پر ہونے والا احتجاج گزشتہ روز پرتشدد رخ اختیار کرگیا تھا جس کے نتیجے میں آج بھارتی حکام نے کرفیو کا اعلان کیا۔
رپورٹ کے مطابق کشیدہ علاقوں میں سی آر پی ایف کے دستے تعینات کر دیے گئے ہیں جبکہ بغیر اجازت جلسے اور جلوس نکالنے پر پابندی لگا دی گئی ہے۔ شہر کی تمام مارکیٹیں اور کاروباری مراکز بھی بند کرا دیے گئے ہیں۔
گزشتہ روز مرکزی شہر لیہہ میں پولیس اور مظاہرین کے درمیان شدید جھڑپیں ہوئیں جن میں 4 افراد ہلاک اور پولیس اہلکاروں سمیت 80 سے زائد زخمی ہوئے۔ بھارتی فورسز نے مظاہرین پر لاٹھی چارج اور آنسو گیس کا استعمال کیا جبکہ مشتعل ہجوم نے گاڑیوں کو نذرِ آتش کیا اور بی جے پی کے دفاتر کو بھی نقصان پہنچایا۔
یہ بھی پڑھیں: آزاد کشمیر کے مختلف علاقوں میں بارش!موسم خوشگوار
یاد رہے کہ بھارتی حکومت نے 2019 میں آئین میں غیر قانونی ترمیم کرکے لداخ کو مقبوضہ کشمیر سے علیحدہ کر دیا تھا۔
