کابل(کشمیر ڈیجیٹل)13 سالہ افغان لڑکا طیارے کے پہیوں میں چھپ کر بھارت پہنچ گیا۔
عالمی خبررساں ادارے کی رپورٹ کے مطابق افغان شہرقندوز سے تعلق رکھنے والا 13 سالہ لڑکا نجی ائیر لائن کی پروازکے پہیوں میں چھپ کرنئی دہلی پہنچ گیا۔
13 سالہ لڑکا جہاز کے لینڈ ہونے کے بعد نئی دہلی ائیرپورٹ پر رن وے پر اکیلا گھومتا ہوا ملا۔
جس کے بعد بھارتی سکیورٹی اہلکاروں نے اسے حراست میں لیا اور کئی گھنٹوں تک پوچھ گچھ کے بعد اسی پرواز کے ذریعے واپس کابل بھیج دیا۔
ابتدائی تفتیش میں لڑکے نے حکام کو بتایا کہ اس نے محض تجسس کے باعث یہ سفر کیا۔
بھارتی سکیورٹی فورس کے ترجمان کے مطابق لڑکا بغیر کسی رکاوٹ کے کابل ائیرپورٹ میں داخل ہوا ، مسافروں کے پیچھے پیچھے چھپ کر جہاز تک پہنچا اور طیارے کے پچھلے لینڈنگ گیئر کے کمپارٹمنٹ میں چھپ گیا۔
سکیورٹی معائنے کے دوران عملے کو ایک چھوٹا سرخ رنگ کا آڈیو اسپیکر بھی ملا جو لڑکے کے پاس تھا۔
بھارتی اخبار انڈین ایکسپریس کے مطابق13 سالہ لڑکا دراصل ایران جانا چاہتا تھا لیکن اسے معلوم ہی نہیں تھا کہ جہاز نئی دہلی جا رہا ہے۔
افغانستان کی سرحدی پولیس کے ترجمان نے بتایا کہ واقعے کی تحقیقات شروع کر دی گئی ہیں۔
ماہرین کا کہنا ہے کہ اس طرح پہیوں میں چھپ کر سفر کرنے کے واقعات امریکا اور یورپ جانے والی پروازوں میں بھی پیش آتے ہیں،
زندہ بچ جانا بہت کم لوگوں کے نصیب میں ہوتا ہے۔ اکثر لوگ اترتے وقت بے ہوشی کے دوران پہیے کھلنے پر نیچے گر کر ہلاک ہوجاتے ہیں۔
مزید یہ بھی پڑھیں:ثقلین فدا کاظمی کی شاندار انٹری، نذیر حسین شاہ فیملی کا بھرپور حمایت کا اعلان
