(کشمیر ڈیجیٹل) : ایران کے صدر مسعود پزشکیان دو روزہ سرکاری دورے کے دوران آج وزیراعظم ہاؤس پہنچے جہاں وزیراعظم شہباز شریف نے ان کا پرتپاک استقبال کیا اور انہیں گارڈ آف آنر پیش کیا گیا۔ اس موقع پر دونوں ممالک کے قومی ترانے بجائے گئے جبکہ چاک و چوبند دستے نے مہمان صدر کو سلامی دی۔
ایرانی صدر نے وزیراعظم ہاؤس میں یادگاری پودا بھی لگایا۔ بعد ازاں وزیراعظم شہباز شریف اور ایرانی صدر مسعود پزشکیان کے درمیان ملاقات ہوئی جس میں باہمی تعاون کے معاملات پر تبادلہ خیال کیا گیا۔ ذرائع کے مطابق دونوں ممالک کے درمیان مختلف معاہدوں اور مفاہمتی یادداشتوں پر دستخط کیے جائیں گے۔
یاد رہے کہ ایرانی صدر مسعود پزشکیان گزشتہ روز دو روزہ سرکاری دورے پر پاکستان پہنچے تھے۔ دورے کے آغاز پر انہوں نے مزار اقبال پر حاضری دی اور صدر مسلم لیگ نواز محمد نواز شریف سے ملاقات بھی کی۔
آج ایرانی صدر پاکستان میں مصروف دن گزاریں گے۔ ان کی صدر مملکت آصف علی زرداری، چیئرمین سینیٹ یوسف رضا گیلانی اور اسپیکر قومی اسمبلی سردار ایاز صادق سے ملاقاتیں طے ہیں۔ ذرائع کے مطابق صدر پاکستان کی جانب سے ایرانی صدر کے اعزاز میں عشائیہ بھی متوقع ہے۔
یہ بھی پڑھیں: بھارت روس سے تیل کی خریداری جاری رکھے گا، امریکی دھمکیوں کو نظر انداز کر دیا گیا
سفارتی ذرائع کے مطابق باہمی ملاقاتوں میں پاک ایران تعلقات، توانائی اور تجارت کے شعبوں میں تعاون پر تبادلہ خیال کیا جائے گا، جبکہ وزیراعظم پاکستان کی جانب سے بھی ایرانی صدر کے اعزاز میں ظہرانے کا اہتمام کیا گیا ہے۔
