(کشمیر ڈیجیٹل) : آزاد کشمیر اور گلگت بلتستان میں 4 اگست سے شدید بارشوں کا نیا سلسلہ شروع ہونے کا امکان ہے، محکمہ موسمیات نے ممکنہ لینڈ سلائیڈنگ، فلیش فلڈنگ اور دیگر ہنگامی حالات کے پیش نظر الرٹ جاری کر دیا ہے۔
محکمہ موسمیات کے مطابق مظفرآباد، راولا کوٹ، وادی نیلم، دیامر، گلگت، سکردو سمیت دیگر پہاڑی علاقوں میں 4 سے 7 اگست کے دوران تیز ہواؤں، گرج چمک اور موسلا دھار بارش کا امکان ہے۔ ان بارشوں کے باعث ندی نالوں میں طغیانی، پہاڑی تودے گرنے اور سڑکوں کی بندش کا خدشہ ہے۔ عوام، سیاحوں اور مسافروں کو خصوصی ہدایت کی گئی ہے کہ وہ غیر ضروری سفر سے گریز کریں اور موسم کی تازہ ترین صورتحال پر نظر رکھیں، خاص طور پر وہ علاقے جہاں پہلے ہی زمین کھسکنے یا سیلابی کیفیت دیکھی جا چکی ہے۔
محکمہ موسمیات کے مطابق اس وقت ملک کے بالائی اور وسطی علاقوں میں کمزور مون سون ہوائیں داخل ہو رہی ہیں، جن کی شدت 4 اگست سے بڑھنے کی توقع ہے۔ 5 اگست کو مغربی ہوا کا ایک اور سلسلہ بھی فعال ہونے جا رہا ہے جو بارشوں کے موجودہ نظام کو مزید طاقتور بنائے گا۔ خیبر پختونخوا کے پہاڑی اضلاع خصوصاً سوات، کوہستان، مانسہرہ، ایبٹ آباد اور ڈیرہ اسماعیل خان میں 4 سے 7 اگست کے دوران موسلا دھار بارشوں کی پیشگوئی ہے، جن کے باعث طغیانی اور زمینی کٹاؤ کا خطرہ بڑھ سکتا ہے۔
وفاقی دارالحکومت اسلام آباد، لاہور، راولپنڈی، مری، سیالکوٹ اور گوجرانوالہ سمیت شمال مشرقی پنجاب کے مختلف شہروں میں بھی شدید بارشوں کا امکان ظاہر کیا گیا ہے، جو نشیبی علاقوں میں شہری سیلاب کی صورت اختیار کر سکتی ہیں۔ جنوبی پنجاب کے ڈیرہ غازی خان اور ملتان جیسے شہروں میں 6 اگست تک بارشوں کے باعث معمولات زندگی متاثر ہونے کی پیش گوئی ہے۔
دوسری طرف سندھ اور بلوچستان کے بیشتر علاقوں میں موسم گرم اور مرطوب رہے گا، البتہ 6 اگست کو سندھ کے ساحلی علاقے اور بلوچستان کے شمال مشرقی حصے، جیسے خضدار، بارکھان اور ژوب میں کہیں کہیں ہلکی بارش متوقع ہے۔
محکمہ موسمیات نے متنبہ کیا ہے کہ کشمیر، خیبر پختونخوا، شمال مشرقی پنجاب، مری و گلیات میں شدید بارشوں کے سبب ندی نالوں میں طغیانی، لینڈ سلائیڈنگ، سڑکوں کی بندش اور کچے مکانات و کمزور ڈھانچوں کو نقصان پہنچنے کا اندیشہ ہے۔
یہ بھی پڑھیں: ویسٹ انڈیز نےٹی 20 سیریز کےسنسنی خیز مقابلے میں پاکستان کو شکست دے دی، سیریز برابر
نیشنل ڈیزاسٹر مینجمنٹ اتھارٹی (NDMA) اور صوبائی ادارے (PDMA) کسی بھی ممکنہ ہنگامی صورتحال سے نمٹنے کے لیے ہائی الرٹ پر ہیں، جبکہ عوام سے اپیل کی گئی ہے کہ وہ محکمہ موسمیات کی سرکاری ویب سائٹ یا پاک ویدر ایپ سے معلومات حاصل کرتے رہیں اور احتیاطی تدابیر اختیار کریں۔
