اسلام آباد:وزیر اعظم محمد شہباز شریف نے کہا ہے کہ وفاقی حکومت حالیہ بارشوں اور سیلاب سے متاثرہ آزاد کشمیر اور گلگت بلتستان کی حکومت، انتظامیہ اور عوام کے شانہ بشانہ کھڑی ہے، متاثرین کوامدادی پیکیج دیا جائیگا۔
جمعہ کو وزیر اعظم آفس کے میڈیا ونگ سے جاری پریس ریلیز کے مطابق وزیراعظم شہباز شریف کی زیر صدارت آزاد کشمیر اورگلگت بلتستان میں حالیہ مون سون کے نتیجے میں جانی و مالی نقصانات پر جائزہ اجلاس ہوا۔
اس موقع پر وزیر اعظم نے کہا کہ حالیہ شدید مون سون سیزن کے تناظر میں ملک بھر اور خصوصاً آزاد کشمیر اور گلگت بلتستان میں جانی و مالی نقصانات کے افسوسناک واقعات ہوئے۔
یہ بھی پڑھیں: ٹرمپ جب بھی جنگ رکوانے کا بیان دیتے ہیں مودی کے زخم تازہ ہوجاتے ہیں، شہبازشریف
وزیراعظم نے کہا کہ وفاقی حکومت دکھ کی اس گھڑی میں آزاد کشمیر اور گلگت بلتستان کی حکومت، انتظامیہ اور عوام کے ساتھ شانہ بشانہ کھڑی ہے۔
متاثرہ علاقوں اور عوام سے اظہار یکجہتی کے لیے جلد گلگت بلتستان کا دورہ کروں گا اور نقصانات کے ہر ممکن ازالے کے لیے وفاقی حکومت کی طرف سے امدادی پیکیج دیا جائے گا۔
انہوں نے ہدایت کی کہ تمام متعلقہ وفاقی ادارے آزاد کشمیر اور گلگت بلتستان کی انتظامیہ سے مل کر ہونے والے نقصانات کا تخمینہ لگائیں اور شدید موسمی صورتحال کے نقصانات سے بچائو کے لیے محکمہ موسمیات کی پیشگی اطلاع کے نظام کو ہنگامی بنیادوں پر موثر اور فعال بنایا جائے۔
وزیراعظم نے کہا کہ متاثرہ علاقوں میں جاری امدادی کاروائیوں میں جانی و مالی نقصانات سے بچائو کو اولین ترجیح دی جائے،ذرائع مواصلات اور سڑکوں کی بحالی اور تعمیر و مرمت پر مقامی اور متعلقہ وفاقی ادارے خصوصی توجہ دیں۔
یہ بھی پڑھیں: وزیراطلاعات مظہر سعید شاہ کی وفاقی وزیرمصطفیٰ کمال سے ملاقات، ہیلتھ پیکیج پر تبادلہ خیال
چیئرمین این ڈی ایم اے لیفٹیننٹ جنرل انعام حیدر ملک نے ملک بھر میں شدید مون سون سے ہونے والے اب تک کے نقصانات، آزاد کشمیر اور گلگت بلتستان میں ممکنہ موسمی صورتحال اور اب تک کیے گئے اقدامات پر اجلاس میں بریفنگ دی۔
چیئرمین این ڈی ایم اےنے بتایا گیا کہ حالیہ مون سون سیزن میں اب تک ملک بھر میں مجموعی طور پر 295 اموات ہو چکی ہیں جبکہ 700 سے زیادہ افراد زخمی ہیں۔
1600 سے زائد گھر مکمل طور پر تباہ ہو گئے ہیں جبکہ 376 مویشی بھی بارشوں کی نظر ہو گئے۔ بریفنگ میں بتایا گیا کہ حالیہ مون سون سیزن میں ندی نالوں میں شدید طغیانی ہے۔
تربیلا چشمہ، تونسہ، کالا باغ کے مقام پر نچلے درجے جبکہ دریائے چناب میں ہیڈ مرالہ اور گدو کے مقام پر درمیانے درجے کے سیلاب کا امکانات ہیں۔
حالیہ مون سون سیزن اگست کے آخر میں شدید ہونے کا امکان ہے این ڈی ایم اے اپنے طور پر بچائو کے لیے بھرپور انتظامات کر رہی ہے۔
اجلاس میں آزاد کشمیر کے وزیراعظم چوہدری انوار الحق، وزیراعلی گلگت بلتستان حاجی گلبر خان،نائب وزیراعظم و وزیر خارجہ محمد اسحاق ڈار، وفاقی وزیر برائے موسمیاتی تبدیلی ڈاکٹر مصدق ملک، وفاقی وزیر برائے اطلاعات و نشریات عطاء اللہ تارڑ، چیئرمین این ڈی ایم اے انعام حیدر ملک اور دیگر اعلی حکام اور سرکاری عہدیداران نے شرکت کی۔
