اسلام آباد: وفاقی حکومت نے بینظیر تعلیمی وظائف پروگرام کے تحت بچوں کی رجسٹریشن کا آسان طریقہ کار اور اہلیت کی شرائط جاری کر دی ہیں۔
اس پروگرام کا بنیادی مقصد مستحق خاندانوں کے بچوں کو تعلیم کی طرف راغب کرنا اور ان کی مالی معاونت فراہم کرنا ہے۔
بینظیر تعلیمی وظائف میں رجسٹریشن کیلئے بچوں کو ہمراہ لے کر قریبی بینظیر انکم سپورٹ پروگرام (BISP) دفتر جانا ہوگا۔
یہ بھی پڑھیں: بی آئی ایس پی کے مستحقین کے لئے رقم میں اضافے کا فیصلہ ،اب کتنے پیسے ملیں گے؟
متعلقہ افسر کو بچوں کا ب فارم اور پہلے سے BISP میں رجسٹرڈ موبائل نمبر فراہم کرنا ضروری ہوگا۔ اس کے بعد افسر رجسٹریشن مکمل کر کے انرولمنٹ سلپ جاری کریگا۔
یہ انرولمنٹ سلپ بچوں کے اسکول لے جا کر کلاس ٹیچر اور ہیڈ ٹیچر سے مکمل کروانا لازم ہے۔ اس میں بچوں کی کلاس، سیکشن، اساتذہ کے نام اور دیگر کوائف درج کرنا ضروری ہوگا۔
مکمل شدہ انرولمنٹ سلپ دوبارہ BISP دفتر میں جمع کروانے کے بعد تصدیقی عمل مکمل کیا جائے گاجس کے بعد وظیفہ جاری کیا جائے گا۔
وظیفہ حاصل کرنے کیلئے بچوں کی کم از کم 70 فیصد اسکول حاضری ضروری ہے۔ اگر کوئی بچہ اسکول تبدیل کرتا ہے تو اس کی اطلاع بھی BISP دفتر کو دینا لازم ہے۔
اہلیت کی شرائط کے مطابق بچوں کی والدہ کا بینظیر کفالت پروگرام میں شامل ہونا لازمی ہے اور نادرا سے جاری شدہ بچوں کا ب فارم بھی فراہم کرنا ہوگا۔
بچوں کیلئے عمر کی حدود درج ذیل ہیں:
پرائمری کے لیے: 4 سے 14 سال
سیکنڈری کے لیے: 8 سے 18 سال
ہائر سیکنڈری کے لیے: 13 سے 22 سال
وظیفہ کی سہ ماہی رقم درج ذیل ہے:
طالبات کے لیے:
پرائمری: 3,000 روپے
سیکنڈری: 4,000 روپے
ہائر سیکنڈری: 5,000 روپے
طلباء کے لیے:
پرائمری: 2,500 روپے
سیکنڈری: 3,500 روپے
ہائر سیکنڈری: 4,500 روپے
پرائمری تعلیم مکمل کرنے والی طالبات کو 3,000 روپے کا خصوصی بونس بھی دیا جائے گا۔
