(کشمیر ڈیجیٹل) وزیر اعظم شہباز شریف نے کہا ہے کہ پاکستان اور امریکا کے درمیان تاریخی تجارتی معاہدے کی منظوری میں قائدانہ کردار ادا کرنے پر وہ امریکی صدر ڈونلڈ ٹرمپ کے شکر گزار ہیں۔
I wish to convey my profound thanks to President Trump @realDonaldTrump for his leadership role in finalization of the historic US-Pakistan trade agreement, successfully concluded by our two sides in Washington, last night.
This landmark deal will enhance our growing cooperation…— Shehbaz Sharif (@CMShehbaz) July 31, 2025
سماجی رابطے کی ویب سائٹ ’ایکس‘ پر جاری بیان میں وزیر اعظم نے کہا کہ یہ تاریخی معاہدہ دونوں ملکوں کے درمیان بڑھتے ہوئے تعاون کو وسعت دے گا اور آنے والے دنوں میں باہمی شراکت داری کو مزید مضبوط کرے گا۔
یاد رہے کہ پاکستان اور امریکا کے مابین تجارتی معاہدہ کامیابی سے طے پا گیا ہے۔ اس معاہدے کا بنیادی مقصد دو طرفہ تجارت کو فروغ دینا، منڈی تک رسائی میں اضافہ، سرمایہ کاری کو راغب کرنا اور باہمی دلچسپی کے شعبوں میں تعاون کو بڑھانا ہے۔
وزارت خزانہ کے مطابق یہ معاہدہ اس وقت طے پایا جب وزیر خزانہ سینیٹر محمد اورنگزیب نے امریکی وزیر تجارت ہاورڈ لوٹنک اور امریکی تجارتی نمائندے جیمیسن گریر سے ملاقات کی۔ اس موقع پر سیکریٹری تجارت جواد پال اور امریکا میں پاکستان کے سفیر رضوان سعید شیخ بھی موجود تھے۔
امریکی صدر ڈونلڈ ٹرمپ نے اس معاہدے کا اعلان اپنی سوشل میڈیا ویب سائٹ ’ٹروتھ سوشل‘ پر کیا۔
یہ بھی پڑھیں: پاکستان اور امریکا کے درمیان تجارتی معاہدہ طے پا گیا، امریکی صدر کا اہم اعلان
اس معاہدے کے نتیجے میں خاص طور پر امریکی منڈی میں پاکستانی مصنوعات پر عائد ٹیرف میں کمی آئے گی۔ وزارت خزانہ کے مطابق یہ معاہدہ دونوں ملکوں کے درمیان اقتصادی تعاون کے ایک نئے دور کا آغاز کرے گا، جس میں توانائی، معدنیات، آئی ٹی، کرپٹو کرنسی اور دیگر اہم شعبے شامل ہیں۔
