اسلام آباد:پاکستان ٹیلی کمیونیکیشن اتھارٹی (پی ٹی اے) نے واٹس ایپ صارفین کو مقامی اور بین الاقوامی نمبروں سے موصول ہونے والے مشتبہ پیغامات سے ہوشیار رہنے کی ہدایت کی ہے۔
پی ٹی اے کے مطابق سائبر مجرمان واٹس ایپ کے جعلی آفیشل اکاؤنٹس بناکر اور واٹس ایپ لوگو استعمال کرکے دھوکہ دہی کے پیغامات بھیج رہے ہیں اور ان پیغامات میں عام طور پر ایک یو آر ایل لنک شامل ہوتا ہے جس پر کلک کرنے سے صارفین کا ڈیٹا چوری ہو سکتا ہے یا ان کا واٹس ایپ اکاؤنٹ مکمل طور پر ہیک ہو سکتا ہے۔
یہ بھی پڑھیں: سیکیورٹی خطرات کے باعث امریکی ایوانِ نمائندگان میں واٹس ایپ پر پابندی
پی ٹی اے نے واضح کیا کہ یہ پیغامات واٹس ایپ سے منسلک نہیں ہیں اور ان میں اکاؤنٹ بند ہونے یا سکیورٹی تصدیق کے جھانسے دئیے جاتے ہیں۔
عوام سے کہا گیا ہے کہ وہ ایسے مشتبہ پیغامات کو نظر انداز کریں اور کسی بھی لنک پر کلک کرنے سے گریز کریں۔
مشتبہ نمبروں کو فوری طور پر بلاک کرنے اور واٹس ایپ کے اندر رپورٹنگ سسٹم کے ذریعے رپورٹ کرنے کی ہدایت بھی کی گئی ہے۔
یہ بھی پڑھیں: کیا آپ بھی واٹس ایپ سے ماہانہ آمدنی چاہتے ہیں؟ تفصیلات جانیں!
پی ٹی اے نے صارفین سے کہا کہ وہ اپنے واٹس ایپ ایپلیکیشن اور ڈیوائس کے آپریٹنگ سسٹم کو ہمیشہ اپ ڈیٹ رکھیں، ٹو اسٹیپ ویریفیکیشن کو فعال کریں اور مشتبہ پیغامات یا لنکس سے محتاط رہیں تاکہ سائبر حملوں سے بچا جا سکے۔
