لاہور (کشمیر ڈیجیٹل نیوز) پاکستان مسلم لیگ (ن) کے سینئر رہنما خواجہ سعد رفیق نے کہا ہے کہ کشمیریوں کو استصواب رائے کا حق نہ ملا تو برصغیر آتش فشاں بنا رہے گا اور پاک بھارت جنگ کا خطرہ رہے گا ۔
سابق وفاقی وزیر نے کہا کہ منتخب ہو یا غیر منتخب ، کوئی بھی حکومت کشمیر کاز سے پیچھے نہیں رہ سکتی ، ہم کشمیریوں کی آزادی تک ان کے ساتھ کھڑے رہیں گے ۔
اسرائیل فلسطینیوں کی نسل کشی کر رہا ہے اور امریکہ اسرائیل کے پیچھے کھڑا ہے ، وہ وقت جلد آئے گا جب فلسطینیوں کو بھی ان کا حق ملے گا اور وہ آزادی سے جی سکیں گے۔
یہ بھی پڑھیں: کشمیری تنہا نہیں،پیپلزپارٹی کشمیر کیساتھ شانہ بشانہ کھڑی ہے ، بلاول بھٹو
ان خیالات کا اظہار انہوں نے کل جماعتی حریت کانفرنس جموں و کشمیر کی جانب سے ’’یومِ الحاقِ پاکستان‘‘کے حوالے سے الحاق پاکستان ریلی کے شرکاء سے خطاب کرتے ہوئے کیا ۔
خواجہ سعد رفیق نے کہا کہ آج کے تاریخی دن ہم سب کل جماعتی حریت کانفرنس کے پلیٹ فارم پر متحد ہیں، 19جولائی 1947ے کو سرینگر میں کشمیریوں نے فیصلہ کیا تھا کہ کشمیر پاکستان کا حصہ ہو گا ۔
انہوں نے کہا کہ آج صرف لاہور یا پاکستان نہیں بلکہ دنیا بھر میں یہ دن منایا جا رہا ہے ۔ آج ہم جماعتوں، فرقوں یا دھڑے بندیوں سے بالاتر ہو کر اکٹھے ہوئے ہیں ۔
یہ بھی پڑھیں: مضبوط پاکستان ہی کشمیریوں کی آزادی کی ضمانت ہے : عبدالقیوم نیازی
کشمیری پہلے ڈوگرہ راج سے لڑتے رہے اور وہ آج بھی بھارت کی لاکھوں کی فوج سے نبردآزما ہیں ، کشمیری لازمی وہ دن دیکھیں گے جب وہ پاکستان کا حصہ ہوں گے ۔
انہوں نے مزید کہا کہ کچھ دن پہلے بھارت کے حملے پر قوم متحد ہوئی اور پاکستان کی فتح سے کشمیریوں کا حوصلہ بلند ہوا ، پاکستان نے کشمیر کیلئے 4جنگیں لڑ کر اپنا لہو کشمیریوں کے لہو کیساتھ شامل کیا ہے ۔
