مظفرآباد/سرینگر/اسلام آباد:کنٹرول لائن کے دونوں جانب اور دنیا بھر میں مقیم کشمیری آج 19 جولائی بروز ہفتہ یوم الحاق پاکستان اس عزم کی تجدید کے ساتھ منائیں گے کہ وہ بھارتی قبضے سے آزادی اور جموں و کشمیر کے پاکستان کے ساتھ الحاق تک اپنی جدوجہد جاری رکھیں گے۔
یوم الحاق پاکستان کے موقع پر خصوصی پروگرامات ہوں گے، 19 جولائی 1947 کو کشمیریوں کے حقیقی نمائندوں نے سری نگر کے علاقے آبی گزر میں سردار محمد ابراہیم خان کی رہائش گاہ پر آل جموں و کشمیر مسلم کانفرنس کے اجلاس کے دوران جموں کشمیر کے پاکستان سے الحاق کی قرارداد متفقہ طور پر منظور کی تھی۔
اس تاریخی قرارداد میں ریاست جموں و کشمیر کی پاکستان کے ساتھ مذہبی، جغرافیائی، ثقافتی اورتہذیبی قربت اور لاکھوں کشمیری مسلمانوں کی امنگوں کے پیش نظر مملکت خداداد کیساتھ اسکے الحاق پر زور دیا گیا ہے۔
یہ بھی پڑھیں: سابق وزیراعظم راجہ فاروق حیدر 19 جولائی کو الحاق پاکستان ریلی کی قیادت کرینگے
یہ قرار داد 14 اور 15 اگست کو تقسیم برصغیر کے منصوبے کے تحت پاکستان اور بھارت کی صورت میں دو خودمختار ریاستوں کی تشکیل سے تقریباً ایک ماہ قبل منظور ہوئی تھی۔
تقسیم برصغیر کے منصوبے کے تحت پانچ سو سے زائد ریاستیں پاکستان یا بھارت میں سے کسی ایک کیساتھ الحاق کیلئے آزاد تھیں جبکہ جموں وکشمیر ایک مسلم اکثریتی ریاست تھی جس کے پاکستان کے ساتھ الحاق میں بظاہر کوئی رکاوٹ درپیش نہیں تھی ۔
کشمیری نمائندوں نے اس حوالے سے قرارداد بھی پاس کی تھی لیکن بھارت نے کشمیریوں کی خواہشات اور امنگوں کو پامال کرتے ہوئے 27اکتوبر 1947 کو سرینگر کے ہوائی اڈے پر فوج اتارکر مسلم اکثریتی جموںوکشمیرپر قبضہ جما لیا۔
یہ بھی پڑھیں: کشمیر کا پاکستان کیساتھ جغرافیائی، نظریاتی، مذہبی وثقافتی رشتہ ،منزل حاصل کرکے رہیں گے، بیرسٹر سلطان
کشمیری بھارت کے اس ناجائز قبضے سے آزادی کیلئے گزشتہ تقریبا78 برس سے قربانیوں کی ایک لازوال تاریخ رقم کر رہے ہیں۔
بھارت کی چیرہ دستیوں کے باوجود کشمیری عوام کا لحاق پاکستان کا خواب زندہ و جاوید ہے ۔ وہ اپنے 19جولائی1947 کے عہد پر قائم و دائم ہیں۔
عظیم آزادی پسند قائد سید علی گیلانی شہید کا نعرہ ہم پاکستانی ہیں ، پاکستان ہمارا ہے کشمیریوں کی پہنچان بن چکا ہے۔
بھارت کا بے انتہا جبر وستم انکے دلوں سے پاکستان کی محبت نکال نہیں سکا اور وہ بھارتی تسلط سے آزادی اور پاکستان کے ساتھ الحاق کی جدوجہد عزم و ہمت سے جاری رکھے ہوئے ہیں۔
