واشنگٹن : امریکی صدر ڈونلڈ ٹرمپ نے کہا ہے کہ آئندہ ہفتے غزہ معاہدہ ممکن ہے، جبکہ حماس نے جنگ بندی کیلئے فوری مذاکرات پر آمادگی ظاہر کر دی ہے۔
واشنگٹن میں صحافیوں سے گفتگو کرتے ہوئے امریکی صدر ڈونلڈ ٹرمپ نے حماس کے مذاکرات سے متعلق بیان کا خیرمقدم کیا اور کہا کہ آئندہ ہفتے غزہ معاہدہ ہوسکتا ہے۔ ان کا کہنا تھا کہ غزہ سے متعلق بہت کچھ کرنا ہے اور وہاں بڑی مقدار میں امداد بھیجی جا رہی ہے۔ ٹرمپ نے کہا کہ وہ اسرائیلی وزیراعظم سے ایران سے متعلق بات کریں گے۔ انہوں نے دعویٰ کیا کہ ایران کا جوہری پروگرام مکمل طور پر ختم کیا جا چکا ہے لیکن ایران اسے دوبارہ شروع کر سکتا ہے۔
دوسری جانب فلسطینی تنظیم حماس نے کہا ہے کہ وہ غزہ میں جنگ بندی کیلئے فوری طور پر مذاکرات شروع کرنے کیلئے تیار ہے۔ حماس نے قطر اور امریکا کی جانب سے پیش کیے گئے قیدیوں کے تبادلے اور جنگ بندی کے مجوزہ معاہدے پر ثالثوں کو مثبت جواب دے دیا ہے۔
غیر ملکی خبررساں ایجنسی کے مطابق حماس نے بیان میں کہا ہے کہ جنگ بندی سے متعلق نئی تجاویز پر مشاورت مکمل کر لی گئی ہے اور ہم نے اپنا مثبت جواب قطر اور مصر کو پہنچا دیا ہے۔
یہ بھی پڑھیں: جعلی ویب سائٹس سے ہوشیار رہیں:پی پی ایس سی کا انتباہ
بیان میں مزید کہا گیا ہے کہ حماس اس منصوبے کو عملی جامہ پہنانے کیلئے مذاکرات کے ایک نئے دور میں سنجیدگی کے ساتھ فوری شرکت کے لیے تیار ہے۔
