لاہور میں جدید شہری ترقی کی سمت ایک نمایاں قدم اٹھاتے ہوئے ملک کی پہلی بجلی پیدا کرنے والی سمارٹ سڑک “روٹ 47” کو ٹریفک کے لیے کھول دیا ہے۔
لاہور کے شہریوں کے لیے خوشخبری! گلبرگ سے والٹن روڈ تک اب صرف چند منٹوں میں پہنچا جا سکے گا اور وہ بھی پاکستان کی پہلی بجلی پیدا کرنے والی سمارٹ سڑک کے ذریعے۔ 4.5 کلومیٹر طویل روٹ 47 کو عوام کے لیے کھول دیا گیا ہے، جو نہ صرف سگنل فری اور جدید ترین تعمیراتی انداز کی حامل ہے بلکہ ماحولیاتی استحکام، شہری سہولت، اور اقتصادی ترقی کا عملی نمونہ بھی ہے۔ اس منصوبے کو پنجاب سنٹرل بزنس ڈسٹرکٹ ڈویلپمنٹ اتھارٹی (CBD Punjab) نے مکمل کیا ہے۔
جدید ترین سہولیات اور تاریخی پس منظر:
روٹ 47 نہ صرف ایک سڑک بلکہ ایک وژن ہے۔ یہ سڑک تقسیمِ ہند کی یادگار کے طور پر بھی تعمیر کی گئی ہے، جہاں یہ مانا جاتا ہے کہ قائداعظم محمد علی جناح کا طیارہ بھی والٹن ایئرپورٹ پر اترا تھا۔ CBD کے مطابق یہ منصوبہ 13 ارب روپے کی لاگت سے مکمل کیا گیا ہے اور اسے “فلیگ شپ پروجیکٹ” قرار دیا گیا ہے۔
پیدل اور سائیکل سواروں کے لیے محفوظ راستے
روٹ 47 پر 2.5 کلومیٹر طویل سائیکل ٹریک بنایا گیا ہے جو شہر میں نان موٹرائزڈ ٹرانسپورٹ کو فروغ دینے کی ایک انوکھی مثال ہے۔ پیدل چلنے والوں کے لیے جدید فٹ پاتھ، پیڈیسٹریئن سگنلز اور 900 میٹر طویل فٹ اوور برج بھی تعمیر کیا گیا ہے، جسے سولر پینلز سے لیس کیا گیا ہے۔
توانائی کا متبادل نظام — سولر پاورڈ سڑک
یہ سڑک اپنی نوعیت کی پہلی سڑک ہے جو سولر پینلز کے ذریعے تقریباً 1 میگا واٹ بجلی پیدا کرنے کی صلاحیت رکھتی ہے۔ یہ توانائی CBD پنجاب کے بنیادی نظام جیسے اسٹریٹ لائٹس، سیکیورٹی، یوٹیلیٹی اور ایمرجنسی بیک اپ کو چلاتی ہے۔ مقصد یہ ہے کہ مستقبل میں شہری سہولیات روایتی بجلی کے نظام سے آزاد ہو کر خودکفیل بن جائیں۔
ماحولیاتی تحفظ: بارش کے پانی کا ذخیرہ اور نکاسی
CBD پنجاب نے بارش کے پانی کے لیے 50 لاکھ گیلن کا ذخیرہ کرنے والا تالاب بھی تعمیر کیا ہے، جو کم از کم دو بڑی بارشوں کا پانی سمیٹنے کی صلاحیت رکھتا ہے۔ اضافی پانی کو چار ری چارج ویلز کے ذریعے زیرِ زمین بھیجا جائے گا تاکہ زیرِ زمین پانی کی سطح میں بہتری لائی جا سکے۔
انڈر گراؤنڈ یوٹیلیٹی نیٹ ورک اور اسمارٹ انفراسٹرکچر:
سڑک کے نیچے تمام بنیادی سہولتیں ، بجلی، گیس، انٹرنیٹ اور دیگر یوٹیلیٹی لائنز ،زیرِ زمین بچھائی گئی ہیں تاکہ علاقے کی خوبصورتی، حفاظت اور دیکھ بھال کو بہتر بنایا جا سکے۔ CBD کا کہنا ہے کہ یہ نظام شہری ترقی کا نیا ماڈل ہے۔
CBD قائد ڈسٹرکٹ ، کاروبار، رہائش اور سرمایہ کاری کا نیا مرکز:
روٹ 47 کے ساتھ CBD قائد ڈسٹرکٹ واقع ہے، جو جدید کاروباری، ثقافتی اور سماجی سرگرمیوں کا مرکز بننے جا رہا ہے۔ یہاں ورٹیکل ڈینسٹی، مکسڈ یوز آرکیٹیکچر، گرین ایریاز، اوپن پلازہ، اور ہائی ٹیک سیکیورٹی سسٹمز موجود ہیں۔ اس علاقے میں ملٹی نیشنل کمپنیز، ٹیک انڈسٹریز اور مالیاتی اداروں کو سہولتیں دی جا رہی ہیں تاکہ یہ علاقہ سرمایہ کاری کا نیا گڑھ بن سکے۔
یہ بھی پڑھیں: ایران اسرائیل جنگ، اصفہان کی جوہری تنصیب پر حملہ
CBD پنجاب کے چیف ایگزیکٹو عمران امین کا کہنا ہے کہ”روٹ 47 شہری ترقی، ماحولیاتی بہتری اور اقتصادی استحکام کی ایک متوازن مثال ہے۔ ہم ایک ایسا شہری تجربہ تشکیل دے رہے ہیں جو جدیدیت، خوبصورتی اور افادیت کو یکجا کرتا ہے۔”
