جہلم ویلی (کشمیر ڈیجیٹل نیوز) 19 جون 2025 — جہلم ویلی اور گردونواح کے علاقوں میں شدید گرمی کی لہر نے معمولاتِ زندگی کو مفلوج کر کے رکھ دیا ہے۔ درجہ حرارت غیر معمولی طور پر بڑھنے کے باعث شہری شدید اذیت میں مبتلا ہیں، جب کہ محکمہ موسمیات نے آئندہ دنوں میں مزید گرمی کی پیش گوئی کی ہے۔
گزشتہ چند روز سے درجہ حرارت 39 سے 41 ڈگری سینٹی گریڈ کے درمیان ریکارڈ کیا جا رہا ہے، جو کہ پہاڑی علاقوں کے لیے تشویشناک حد تک زیادہ ہے۔ ماہرین کے مطابق، یہ غیر معمولی موسمی صورتحال عالمی سطح پر ماحولیاتی تبدیلیوں کا نتیجہ ہے۔
شدید گرمی کے باعث بزرگ اور بچے سب سے زیادہ متاثر ہو رہے ہیں۔ کئی دیہاتی علاقوں میں پانی کی قلت بھی پیدا ہو چکی ہے، جب کہ بجلی کی بار بار بندش نے عوام کی مشکلات میں مزید اضافہ کر دیا ہے۔
ہیلتھ ڈپارٹمنٹ نے شہریوں کو ہیٹ اسٹروک سے بچنے کے لیے احتیاطی تدابیر اختیار کرنے کی ہدایت جاری کی ہیں۔ ماہرین صحت نے مشورہ دیا ہے کہ شہری دھوپ میں غیر ضروری طور پر باہر نہ نکلیں، زیادہ سے زیادہ پانی پئیں اور ہلکے رنگ کے کپڑے پہنیں۔
کسانوں کا کہنا ہے کہ گرمی کی شدت سے فصلیں متاثر ہو رہی ہیں اور پانی کی کمی کے باعث زرعی پیداوار میں بھی کمی کا خدشہ ہے۔
محکمہ موسمیات کے مطابق اگلے ایک ہفتے تک گرمی کی یہ لہر برقرار رہ سکتی ہے، لہٰذا عوام کو چاہیے کہ وہ احتیاطی تدابیر اختیار کریں اور صحت کے حوالے سے غفلت نہ برتیں۔
دریائے پونچھ ،زندہ پیر نوڑوٹا میں سیاحوں کا ہجوم،حکومت سے سہولیات کا مطالبہ
