مظفرآباد (کشمیر ڈیجیٹل)سپیکر قانون ساز اسمبلی چوہدری لطیف اکبر نے کہا کہ ہندوستان کی افواج کو پاکستان تک پہنچنے کے لیے ہمارے سینوں سے گزرنا ہوگا۔
پہلگام واقعہ دراصل ہندوستانی چال ہے جس کے ذریعے وہ خطے کے امن کو پامال کرنا چاہتا ہے، ہم نے آزاد کشمیر قانون ساز اسمبلی کا اجلاس طلب کیا اور تمام سیاسی جماعتوں نے اس واقعہ کی پرزور مذمت کی۔
ان خیالات کا اظہار انہوں نے پندرہویں نیشنل ورکشاپ بلوچستان کے وفد سے ملاقات کے دوران کیا۔۔سپیکر قانون ساز اسمبلی چوہدری لطیف اکبر اور وزیر سمال انڈسٹریز تقدیس کوثر گیلانی نے وفد کو آزاد جموں و کشمیر کی تاریخ، سیاست، تعلیمی صورتحال اور انتظامی ڈھانچے سے متعلق تفصیلی بریفنگ دی ۔
یہ خبربھی پڑھیں ۔صدرزرداری کے مفاہمتی سیاست کے وژن سے ملک بحرانوں سے نکل آیا،لطیف اکبر
سپیکر اسمبلی چوہدری لطیف اکبر نے کہا کہ پاکستان کی یونیورسٹیز میں آزاد کشمیر کے طلبہ کے لیے ڈھائی فیصد کوٹہ مختص ہے، جبکہ آزاد کشمیر کی جامعات میں پاکستان بھر سے طلبہ تعلیم حاصل کرتے ہیں۔
سپیکر اسمبلی نے مزید بتایا کہ ڈیفنس، کرنسی اور فارن ایکسچینج پاکستان کے ذمہ ہیں، پاکستان نے پہلگام واقعے کی غیر جانبدارانہ تحقیقات کا مطالبہ کیا ہے۔
بھارت کی ہٹ دھرمی اس واقعہ کی حقیقت کو بے نقاب کر رہی ہے، اسپیکر نے زور دیا کہ آزادی کی قدر کریں، مقبوضہ کشمیر میں ظلم و ستم کا اندازہ صرف وہی کر سکتا ہے جو اسے جھیل رہا ہو۔
جس مذہب میں اپنے ہی لوگوں کے لئے فرقہ بندی ہو وہ دوسروں کو کیا حقوق دے گا ،انہوں نےمزید کہا کہ آزاد کشمیر میں شرح خواندگی پاکستان کے تمام صوبوں سے زیادہ ہے اور یہاں خواتین بھی ہر شعبہ زندگی میں بھرپور کردار ادا کر رہی ہیں۔
انہوں نے کہا کہ آزاد کشمیر کی حکومت اور عوام کسی بھی ایمرجنسی صورتحال سے نمٹنے کے لیے مکمل تیار ہیں، اور ہماری عوام پاک فوج کے شانہ بشانہ کھڑ ے ہیں۔
