اسلام آباد(مانیٹرنگ ڈیسک)پاکستانی سفیر رضوان سعید شیخ نے پہلگام واقعے کے بعد بھارت کے ساتھ کشیدہ صورتحال پر ایک امریکی چینل کے سامنے دو ٹوک موقف اختیار کیا ہے۔
امریکی ٹی وی چینل کو انٹرویو دیتے ہوئے پاکستانی سفیر رضوان سعید شیخ نے کہا کہ پاکستان نے ہمیشہ ذمہ داری اور صبر کا مظاہرہ کیا ہے۔
ہم امن چاہتے ہیں لیکن یہ ہماری کمزوری نہیں سمجھا جانا چاہئے،پاکستانی سفیر رضوان سعید شیخ نے کہا کہ اگر پاکستان کے خلاف کسی قسم کی مہم جوئی کی گئی تو ہم اس کا بھرپور جواب دیں گے۔
انہوں نے کہا کہ ہم خطے میں تناؤ نہیں چاہتے لیکن اگر دو جوہری طاقتیں آمنے سامنے آئیں تو اس بارے میں کچھ نہیں کہا جا سکتا کہ صورتحال کس طرف جائےگی۔
ہماری اقتصادی ترقی امن کی ضرورت ہے، رضوان سعید شیخ نے کہا کہ بھارت نے ابھی تک پاکستان یا دنیا کو پہلگام واقعے کے حوالے سے کوئی ثبوت پیش نہیں کیا۔
یہ خبر بھی پڑھیں ۔پاک بھارت کشیدگی،امریکی وزیرخارجہ کادونوں ممالک سے رابطوں کا اعلان
بھارت اپنی جابرانہ پالیسیوں، انتخابی رکاوٹوں یا انتظامی کوتاہیوں کا بوجھ پاکستان پر نہیں ڈال سکتا۔
انہوں نے کہا کہ اگر 700،000 فوجیوں کی موجودگی بھی مقبوضہ کشمیر میں امن کو یقینی نہیں بنا سکتی تو یہ ہندوستان کے لیے لمحہ فکریہ ہے۔
رضوان سعید شیخ نے کہا کہ پاکستان دہشت گردی سے سب سے زیادہ متاثر ہونے والا ملک ہے اور گزشتہ سال پاکستان میں دہشت گردی کے تقریباً 1000 واقعات پیش آئے۔
انہوںنے کہا کہ پاکستان نے دہشت گردی کے خلاف عالمی جنگ میں اہم کردار ادا کیا ہے جبکہ دہشت گردی کے خلاف جنگ میں ہزاروں جانیں اور اربوں ڈالر کا مالی نقصان بھی اٹھایا ہے۔
