مظفر آباد : پاک بھارت کشیدگی کے تناظر میں وزیراعظم آزادکشمیر چوہدری انوارالحق کی زیر صدارت آل پارٹیز کشمیر کانفرنس کا انعقاد کیا گیا۔
آل پارٹیز کشمیر کانفرنس میں سیاسی و مذہبی جماعتوں کے نمائندگان نے بھرپورشرکت کی اورمسلح افواج پاکستان سے بھرپور یکجہتی کا اظہار کیا گیا۔
کل جماعتی کشمیر کانفرنس نے بھارتی آبی جارحیت یکسر مسترد کرتے ہوئےوفاقی حکومت اور مسلح افواج پاکستان کی جانب سے ہندوستان کو موثر جواب دینے پر بھرپور خراج تحسین پیش کیاگیا۔
کانفرنس میں مقبوضہ کشمیر میں بھارتی مظالم کو بین الاقوامی سطح پر اجاگر کرنے کے لئے اپنامتحرک کردار ادا کرنے کے بھرپور عزم کا اظہار کیا گیا۔
کل جماعتی کشمیر کانفرنس میں کہا گیا کہ ایل و سی پر کسی بھی طرز کی جارحیت بھارت کی آخری غلطی ہو گی ۔ بھارت مقبوضہ کشمیر میں فالس فلیگ آپریشن کا بہانا بنا کر قتل و غارت کا بازار گرم کئے ہوئے ہے۔
اے پی سی میں پاکستان کی سلامتی اور تحفظ کے لئے ہر قربانی دینے کے عزم کا اظہار کیا گیا اورمطالبہ کیا گیا کہ دنیا بھارت کے جنگی جنون کا فوری نوٹس لے ۔
کل جماعتی کشمیر کانفرنس میں بھارت کے فالس فلیگ آپریشنز کو بے نقاب کرنے پر مسلح افواج کو زبردست الفاظ میں خراج تحسین پیش کیا گیا ۔ کانفرنس کے شرکاء نے یکجہتی کے ساتھ مسلح افواج کے شانہ بشانہ کھڑے ہونے کے عزم کا اظہارکیا۔
آل پارٹیز کشمیر کانفرنس میں وزیراعظم آزاد کشمیر چوہدری انوار الحق ، اپوزیشن لیڈر خواجہ فاروق ، صدر مسلم لیگ ( ن) شاہ غلام قادر ، سپیکر آزادجموں و کشمیر قانون ساز اسمبلی چوہدری لطیف اکبر ، ممبر قانون ساز اسمبلی و سینئر رہنما پیپلز پارٹی چوہدری یاسین شریک ہوئے۔
سابق وزیراعظم سردار عتیق احمد خان ، سابق وزیراعظم آزاد کشمیر سردار قیوم نیازی ، موسٹ سینئر وزیر کرنل ریٹائرڈ وقار احمد نور بھی کانفرنس میں شریک ہوئے۔
سابق وزیراعظم سردار یعقوب خان ،کنوئنیر آل پارٹیز حریت کانفرنس غلام محمد صفی ، صدر لبریشن لیگ منظور قادر ڈار بھی کانفرنس میں موجود تھے۔
وزرائے حکومت ، دیوان علی خان چغتائی ، سردار عامر الطاف ، میاں عبدالوحید ، عبدالماجد خان ، چوہدری اظہر صادق ، پروفیسر تقدیس گیلانی سمیت دیگر نے بھی کانفرنس میں شرکت کی۔
یہ بھی پڑھیں: پاک بھارت کشیدگی پر آل پارٹیز پارلیمنٹری کشمیر گروپ برطانیہ کا اجلاس طلب
