اسٹیٹ بینک آف پاکستان نے جمعرات یکم مئی 2025ء کو ملک بھر میں بینکنگ سروسز معطل رکھنے کا اعلان کیاہے۔ ترجمان کے مطابق یومِ مزدور پر قومی سطح پر عام تعطیل ہوگی، جس کے باعث نہ صرف اسٹیٹ بینک بلکہ تمام کمرشل بینکس اور مالیاتی ادارے بھی بند رہیں گے۔
یومِ مزدور، جسے عالمی سطح پر “Labour Day” یا “International Workers’ Day” کے نام سے جانا جاتا ہے، ہر سال یکم مئی کو منایا جاتا ہے۔ اس دن کا آغاز 1886ء میں امریکہ کے شہر شکاگو سے ہوا، جب مزدوروں نے آٹھ گھنٹے کام کے اصول کے لیے بھرپور احتجاج کیا۔ یہ مظاہرہ “ہے مارکیٹ اسکوائر” (Haymarket Square) میں ہوا جہاں پولیس اور مظاہرین کے درمیان تصادم ہوا، جس میں کئی افراد جاں بحق اور زخمی ہوئے۔
یہ واقعہ عالمی مزدور تحریک کی علامت بن گیا، اور بعد ازاں دنیا کے مختلف ممالک نے 1 مئی کو مزدوروں کے حقوق کے دن کے طور پر منانا شروع کیا۔ پاکستان میں بھی یومِ مزدور کو سرکاری طور پر منایا جاتا ہے اور اس روز محنت کش طبقے کی جدوجہد، قربانیوں اور حقوق کو تسلیم کرنے کے لیے عام تعطیل کا اعلان کیا جاتا ہے۔
