اسلام آباد ( مانیٹرنگ ڈیسک)امریکہ نے مقبوضہ کشمیر میں پہلگام واقعے کے بعد بھارت اور پاکستان کے درمیان کشیدگی پر اپنا ردعمل ظاہر کیا ہے، امریکہ نے ایک بار پھر مقبوضہ کشمیر میں دہشت گردی کے واقعے کی مذمت کرتے ہوئے اس واقعے میں ملوث افراد کو انصاف کے کٹہرے میں لانے پر زور دیا ہے۔
امریکی محکمہ خارجہ کی ترجمان ٹیمی بروس نے پریس بریفنگ میں کہا کہ ہم ان لوگوں کے لیے دعا کرتے ہیں جن کے پیارے اس مارے گئے ہم زخمیوں کی جلد صحت یابی کے لیے بھی دعا گو ہیں ۔
اس سوال پر کہ کیا ڈونلڈ ٹرمپ نے اپنی پہلی مدت کے دوران پاکستان اور بھارت کے درمیان امن قائم کرنے میں کردار ادا کرنے کی خواہش کا اظہار کیا تھا، امریکی محکمہ خارجہ کی ترجمان ٹیمی بروس کا کہنا تھا کہ وہ اس معاملے پر کوئی بھی تبصرہ نہیں کریں گی۔
یہ خبر بھی پڑھیں ۔پہلگام فالس فلیگ کے بعد بھارتی فوج کا کریک ڈاؤن، 1500 سے زائد کشمیری گرفتار
ان کا کہنا تھا کہ وہ صورتحال پر مزید کچھ نہیں کہیں گی صدر ڈونلڈ ٹرمپ اور وزیر خارجہ مارکو روبیو پہلے ہی اس معاملے پر بات کر چکے ہیں ہم نے معاملے پر اپنی پوزیشن واضح کر دی ہے میں مزید کچھ نہیں کہنا چاہتی ۔
اس سوال پر کہ کیا ٹرمپ انتظامیہ پاکستان اور بھارت کے درمیان بڑھتی ہوئی کشیدگی کو کم کرنے میں کوئی کردار ادا کر رہی ہے؟ترجمان ٹمی بروس نے کہا کہ صورتحال تیزی سے بدل رہی ہے اور ہم اس پر نظر رکھے ہوئے ہیں اور یقینی طور پر اس وقت ہم کشمیر یا جموں کی حیثیت پر کوئی پوزیشن نہیں لے رہے ہیں۔
یاد رہے کہ مقبوضہ کشمیر کے علاقے پہلگام میں 26 بھارتی سیاحوں کی ہلاکت کے بعد پاکستان اور بھارت کے درمیان کشیدگی میں اضافہ ہوا ہے۔
