اسلام آباد:پاکستان کرکٹ بورڈ (پی سی بی) نے قومی کرکٹ ٹیم کے مستقل ہیڈ کوچ کیلئے اشتہار دے دیا۔ پی سی بی کی جانب سے اپنی ویب سائٹ پر ہیڈ کوچ کا اشتہار جاری کیا گیا ہے۔
خیال رہے کہ پی سی بی نے عاقب جاوید کو چیمپئنز ٹرافی تک عبوری ہیڈ کوچ مقرر کیا تھا، پھر دورہ نیوزی لینڈ کیلئے انہیں مزید ذمہ داریاں دی گئیں۔
ذرائع کا کہنا ہےکہ عاقب جاوید اب ہیڈکوچ کیلئے دلچسپی نہیں رکھتے، عاقب جاوید ڈائریکٹر ہائی پرفارمنس کیلئے دلچسپی رکھتے ہیں۔
پی سی بی نے ڈائریکٹر ہائی پرفارمنس کیلئے بھی اشتہار جاری کیا ہے۔ ندیم خان کے مستعفی ہونے کے بعد سے ڈائریکٹر ہائی پرفارمنس کا عہدہ خالی تھا۔
ذرائع کے مطابق پی سی بی ایک بار پھر غیر ملکی ہیڈ کوچ کی طرف جاسکتا ہے۔ہیڈ کوچ کے لیے لیول تھری کرکٹ کوچ کی اہلیت درکار ہے، 4 مئی تک ہیڈ کوچ کیلئے درخواستیں طلب کی گئی ہیں۔
ذرائع کا کہنا ہےکہ ہیڈ کوچ کیلئے پاکستان کرکٹ بورڈ کے پاس محدود چوائس ہیں اور غیر ملکی کوچ کی طرف پی سی بی کا رحجان زیادہ ہے۔ذرائع کا یہ بھی کہنا ہےکہ پی سی بی کوچ کیلئے بڑے ناموں کی طرف نہیں جائیگا۔
یہ بھی پڑھیں: شاہد آفریدی کا چیئرمین پی سی بی محسن نقوی کو ایک عہدہ چھوڑنے کا مشورہ
