اسلام آباد: پاکستان کے مختلف علاقوں میں آج او ر کل شدید بارش، آندھی اور ژالہ باری کا امکان ہے۔ این ڈی ایم اے کے نیشنل ایمرجنسیز آپریشن سینٹر(این ای او سی) نے شدید بارش، ژالہ باری اور آندھی سے متعلق الرٹ جاری کردیا ہے۔
این ای او سی کی جانب سے کہا گیا ہے کہ آج18 اورکل 19 اپریل کو شدید بارش اور بعض مقامات میں ژالہ باری کا امکان ہے۔اسلام آباد، راولپنڈی سمیت پنجاب کے کئی علاقوں میں شدید موسمی حالات کی وارننگ جاری کی گئی ہے۔
آزادکشمیر، پنجاب کے علاقوں چکوال، گجرات اور جہلم میں آندھی طوفان اور ژالہ باری ہو سکتی ہے۔وسطی پنجاب میں فیصل آباد، حافظ آباد، جھنگ، خوشاب، میانوالی، لاہور، نارووال، ساہیوال، سرگودھا اور شیخوپورہ بھی شدید موسمی زد میں آ سکتے ہیں۔
الرٹ کے مطابق تیز ہواؤں اور بارش سے بجلی کی بندش اور حادثات کا خدشہ ہے۔ پنجاب میں ممکنہ شدید موسمی صورت حال کے باعث فصلوں کو نقصان پہنچ سکتا ہے۔
این ڈی ایم اے نے شہریوں کو ہدایت کی ہے کہ موسمی حالات سے آگاہ رہنے کے لیے موبائل ایپ این ڈی ایم اے ڈیزاسٹر الرٹ کو فالو کریں۔عوام اس دورانیے میں غیرضروری سفر سے پرہیز کریں۔
الرٹ میں کہا گیا ہے کہ کسان فصلوں کو نقصان سے بچانے کیلئے ضروری پیشگی انتظامات رکھیں۔ آندھی و طوفان کی صورت میں کمزور عمارتوں اور درختوں سے دور رہیں۔
واضح رہے کہ بدھ کی شام پاکستان کے وفاقی دارالحکومت اسلام آباد کے کئی سیکٹرز میں غیرمعمولی ژالہ باری کے نتیجے میں گاڑیوں، عمارات کے شیشوں اور درختوں کو شدید نقصان پہنچا ہے۔
محکمہ موسمیات کے مطابق گزشتہ 24 گھنٹے کا موسم ملک کے بیشتر علاقوں میں موسم گرم اور خشک جبکہ جنوبی علاقوں میں شدید گرم رہا۔ بالائی خیبرپختونخوا ،خطہ پوٹھوہار ، اسلام آباد اورکشمیر میں آندھی اور گرج چمک کے ساتھ بارش ہوئی۔ بعض مقامات پرژالہ باری بھی ہوئی۔
